Jeŭrasajuz sarvie Biełarusi kantrakt na $1,5 młrd?

Jeŭropa ŭzhadała pra sankcyi na biełaruskich eksparcioraŭ zbroi.

Najbolš realnym vidam ekanamičnych sankcyj vyhladaje embarha na ekspart biełaruskaj zbroi. Havorka viadziecca pra dziejnaść kampanij «Biełtechekspart» i «Biełźniešpramservis». Dachody ad ich, na dumku jeŭrapiejskich ekśpiertaŭ, mohuć pieraličvacca na asabistyja rachunki biełaruskich čynoŭnikaŭ.

Apošni jeŭrapiejski klijent — Słavakija

Na «Biełźniešpramservis» ŭ 2004 hodzie ŭžo nakładalisia sankcyi. Tady ZŠA abvinavacili 14 arhanizacyj pa ŭsim śviecie ŭ niezakonnym prodažy zbroi Iranu i nakłali dvuchhadovuju zabaronu na handal z hetymi subjektami. Sankcyi nakładalisia nie na krainu, a mienavita na kankretnuju kampaniju.

Tym nie mienš, prodaž biełaruskaj zbroi praciahvaŭsia. Infarmacyju pra kantrakty na pastaŭki zbroi źbirajuć niekalki arhanizacyj, u tym liku AAN (z 2001 hoda) i Stakholmski mižnarodny instytut daśledavańnia prablem miru.

Apošnija hady nie nadta prybytkovyja dla biełaruskich pradaŭcoŭ zbroi.

U 2009 hodzie klijentami biełaruskich kampanij byli Sudan, jaki kupiŭ try šturmaviki Su-5, Uhanda, jakaja atrymała 23 tanki T-55, i Azierbajdžan. Kaŭkazcaŭ zacikavili šturmaviki i haŭbicy.

U 2008-m siarod klijentaŭ zaŭvažanyja Siryja, Rasija i ŭsio tyja ž Azierbajdžan i Sudan.

U 2007 hodzie ŭdałosia atrymać hrošy z Armienii, Erytrei i Sudana. Jak bačna, nivodnaj jeŭrapiejskaj krainy ŭ pieraliku niama.

Apošniaja pakupka takoha kštałtu prychodzicca na 2005 hod — tady Słavakija nabyła dva vajenna-transpartnyja viertaloty Mi-8.

Niaŭličanaje Pieru

Miarkujecca, što najbolš prybytkovym dla Biełarusi byŭ pieryjad z 1992-ha pa 2001 hod, jaki nie adsočvaŭsia statystykaj AAN. Pa padlikach daśledčaj słužby kanhresa ZŠA, tolki za 1998—2001 hh. Biełaruś pradała zbroi na $1 miljard i zajmała 11-je miesca ŭ śviecie. Samym aktyŭnym pakupnikom tady vystupała Pieru. Tudy pradavali zbroju i techniku, jakaja zastałasia na terytoryi Biełarusi z savieckich časoŭ.

Patencyjny isłandski abłom

Sankcyi mahli b prajści mima Biełarusi niezaŭvažna, kali b nie patencyjny kantrakt, infarmacyja pra jaki źjaviłasia ŭ vieraśni minułaha hoda. Pryvatnaja kampanija ECA Program zaklučyła z «Biełtechekspartam» damovu na pastaŭku 15 samalotaŭ Su-27. Košt pastaŭki aceńvaŭsia ŭ $1,5 miljarda. Kampanija viała pieramovy ab arendzie ŭ Isłandyi zakansiervavanaj avijabazy ŭ Kiefłaviku, kab vykarystać jaje dla trenirovak VPS roznych krain. Razhladałasia mahčymaść u budučym nabyć u Biełarusi jašče 18 takich samych samalotaŭ.

Isłandyja aktyŭna zbližajecca ź ES, tamu, nie vyklučana, moža dałučycca da ahulnych sankcyj.

Ale Jeŭrasajuz nie moža ŭpłyvać na afrykanskija krainy, najbolš zacikaŭlenyja ŭ biełaruskaj zbroi. Mahčyma, hrošy daviadziecca pieradavać praź inšuju valutu, a nie dalar ci jeŭra, i praź inšyja banki, a nie jeŭrapiejskija i amierykanskija.