Maci źniavolenaha ŭ SIZA KDB palityka Paŭła Sieviarynca sprabuje damahčysia sustrečy z synam ci chacia b taho, kab jamu pieradavali nieabchodnyja leki.
Taćciana Sieviaryniec raskazała, što 31 studzienia napisała skarhu na imia namieśnika hienieralnaha prakurora, bo adkazy z Hienprakuratury na jaje raniejšyja skarhi jana ličyć abraźlivymi biurakratyčnymi adpiskami.
Jana aburanaja tym, što jaje minuły zvarot u Hienieralnuju prakuraturu nakiravali ŭ SIZA KDB — znoŭ u tuju ž ustanovu, dzie joj admovili ŭ sustrečy sa źniavolenym synam. Takim čynam, ličyć Taćciana Sieviaryniec, spadziavacca na stanoŭčy vynik nie vypadaje: u SIZA KDB joj užo kazali, što sustrečy z rodnymi mohuć dazvalacca, ale heta zaležyć ad rašeńnia śledčych pa spravie ab masavych biesparadkach u Minsku 19 śniežnia.
U svajoj apošniaj skarzie spadarynia Sieviaryniec patrabuje, kab joj piśmova paviedamili pra kankretnyja pryniatyja zachady, a nie abmiažoŭvalisia paviedamleńniami pra pierasyłku dakumientaŭ pa instancyjach.
Jašče adnu skarhu Taćciana Sieviaryniec napisała ŭ SIZA KDB. Pavodle adzinaha atrymanaha ad Paŭła lista, jon tak i nie atrymaŭ leki, jakija jana pieradała jamu jašče
Spadarynia Sieviaryniec kaža, što admysłova pryjechała ź Viciebska ŭ Minsk, kab damahčysia sustrečy z synam ci chacia b taho, kab jamu pieradali leki. 31 studzienia ŭ jaje ŭziali čarhovuju pieradaču dla Paŭła — ciopłaje adzieńnie dy inšyja nieabchodnyja rečy, — ale maci nie ŭpeŭnienaja, što ŭsio heta Paŭłu nasamreč pieradaduć.
