Saviet dyrektaraŭ naftahazavaj kampanii (NHK) «Słaŭnafta», jakaja zajmaje siomaje miesca ŭ Rasii pa abjomach zdabyčy nafty, pryniaŭ rašeńnie zakryć pradstaŭnictva ŭ Minsku.
Jak paviedamiła dyrektar departamienta AAT «Słaŭnafta» pa suviaziach z orhanami dziaržaŭnaj ułady Maryja Hrydnieva, biełaruskaje pradstaŭnictva zakryvajecca «ŭ miežach aptymizacyi dziejnaści kampanii».
Rašeńnie savieta dyrektaraŭ uvajšło ŭ siłu 14 lutaha. Prezidentu NHK «Słaŭnafta» Juryju Suchanavu daručana zabiaśpiečyć nieabchodnyja mierapryjemstvy pa zakryćci pradstaŭnictva ŭ paradku, praduhledžanym zakanadaŭstvam RF i Biełarusi, i prainfarmavać ab hetym adpaviednyja dziaržaŭnyja orhany, paviedamiła Hrydnieva.
Biełaruskaje pradstaŭnictva «Słaŭnafty» było adkryta ŭ kastryčniku 2006 hoda. U Biełarusi «Słaŭnafta» sumiesna z uradam kiruje Mazyrskim naftapierapracoŭčym zavodam. Dola «Słaŭnafty» ŭ statutnym kapitale NPZ składaje 42,58%, urada Biełarusi — 42,76%.
***
Sumiesnaje AAT «Naftahazavaja kampanija «Słaŭnafta» zasnavana ŭ žniŭni 1994 hoda zhodna z pastanovaj urada RF i rasparadžeńniem Savieta ministraŭ Biełarusi. Asnoŭnymi zasnavalnikami kampanii vystupili Dziaržkammajomaść Rasii ź pieršapačatkovaj dolaj u statutnym kapitale kampanii 86,3% i Mindziaržmajomaść Biełarusi (zaraz — Dziaržkammajomaść) z dolaj 7,2%.
Siońnia «Słaŭnafta» ŭvachodzić u dziasiatku najbujniejšych naftavych kampanij Rasii. Vałodaje licenzijami na hieałahičnaje vyvučeńnie nietraŭ i zdabyču nafty i hazu na 37 licenzijnych učastkach na terytoryi Zachodniaj Sibiry i Krasnajarskaha kraju.
