Cynizm Miniusta: Sapiełku vyklučyli z advakataŭ za «niezabieśpiačeńnie abarony abvinavačanych» 7

Pavieł Sapiełka vyklučany ź Minskaj haradskoj kalehii advakataŭ (MHKA) za parušeńnie patrabavańniaŭ Kryminalna-pracesualnaha kodeksa i praviłaŭ prafiesijnaj etyki advakata.

Pra heta havorycca ŭ paviedamleńni, raźmieščanym na sajcie Ministerstva justycyi.

Paviedamlajecca, u pryvatnaści, što pry razhladzie materyjałaŭ pravierki ŭ dačynieńni da advakata jurydyčnaj kansultacyi № 2 Savieckaha rajona Minska Paŭła Sapiełki na pasiadžeńni prezidyuma MHKA 3 sakavika «ustanoŭlena, što Sapiełkam dapuščany šerah parušeńniaŭ patrabavańniaŭ Kryminalna-pracesualnaha kodeksa, Praviłaŭ prafiesijnaj etyki advakata, a taksama rašeńniaŭ orhana advakackaha samakiravańnia «.

«Dapuščanyja parušeńni vykazalisia ŭ niajaŭcy pa vykliku orhana, jaki viadzie kryminalny praces, dla ŭdziełu ŭ śledčym dziejańni pa kryminalnaj spravie i niezabieśpiačeńni abarony abvinavačanych,

a taksama ihnaravańni rašeńniaŭ kiraŭnictva kalehii i prajavie tym samym niepavahi da orhanaŭ advakackaha samakiravańnia», — havorycca ŭ paviedamleńni.

Prezidyum MHKA pryznaŭ dziejańni Sapiełki «niesumiaščalnymi sa zvańniem advakata» i pryniaŭ rašeńnie ab jaho vyklučeńni z členaŭ kalehii advakataŭ, infarmuje Miniust.

Pavieł Sapiełka źjaŭlaŭsia abaroncam byłoha kandydata ŭ prezidenty Andreja Sańnikava, a taksama Paŭła Sieviarynca — kiraŭnika vybarčaha štaba eks-kandydata Vitala Rymašeŭskaha i Dźmitryja Daškieviča — lidera mižnarodnaj moładzievaj arhanizacyi «Małady front» (Čechija).

Kalehi-jurysty nazyvajuć Sapiełka adnym z najbolš prafiesijnych i najbolš pryncypovych advakataŭ Biełarusi. Na praciahu mnohich hadoŭ jon abaraniaŭ fihurantaŭ hučnych palityčnych pracesaŭ. Jon, u pryvatnaści, byŭ abaroncam Mikałaja Aŭtuchoviča, siabra niezarehistravanaj arhanizacyi «Partniorstva» Cimafieja Drančuka, pradstaŭlaŭ u sudzie intaresy Zinaidy Hančar pa spravie źnikłaha ŭ 1999 hodzie Viktara Hančara, a taksama byŭ advakatam Alaksandra Barazienki — fihuranta «spravy čatyrnaccaci» ab udziele ŭ akcyjach pratestu pradprymalnikaŭ, abaraniaŭ redaktara haziety «Navinki» Paŭła Kanavalčyka pa spravie ab abrazie prezydenta.

Niezaležnyja jurysty rasceńvajuć vyklučeńnie Sapiełka z MHKA jak raspravu nad advakatam i čarhovy vitok cisku na niezaležnuju advakatury ŭ Biełarusi.

Sierhiej Pulša, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH