Na miesiac vymierła valutnaja birža, a jeŭra praciahvaje pavolny rost.
U apošnija dni kolkaść valuty, jakaja zavoziłasia ŭ abmieńniki, składała $3-5 tysiač, što niedastatkova pry šalonym popycie. Pry adsutnaści dalaraŭ i jeŭra nasielnictva skuplała navat rasijskija rubli.
Jeŭra ŭ kroku ad rekordaŭ
Aficyjny kurs jeŭra dabraŭsia da rekordu. U abmieńnikach kurs prodažu siahaje až 4400 rubloŭ. Pakolki patrochu raście i kurs rasijskaha rubla, valutny košyk užo dajšoŭ da svajho histaryčnaha maksimumu. Z pačatku hoda devalvacyja ŭžo składaje 5,5%.
Niaŭmolny dalar
Ekanamist Siarhiej Žbanaŭ pryvodzić svaje padliki: “Pakolki biełaruski rubiel źjaŭlajecca słaba kanviertavanaj valutaj i jaho abarot ažyćciaŭlajecca ŭ miežach respubliki, abjektyŭny abmienny kurs nacyjanalnaj valuty možna lohka vyličyć. Dla hetaha abjom aktyŭnaj hrašovaj masy (13,165 tryljonaŭ rubloŭ) varta padzialić na pamier zołatavalutnych reziervaŭ ($4,023 miljarda).Atrymlivajecca, što 1 dalar realna kaštuje 3272 rubli. I navat kali Nacbank budzie admaŭlacca ad devalvacyi i ŭtrymlivać kurs na ciapierašnim uzroŭni koštam reziervaŭ, to realny kurs dalara budzie niaŭchilna pavialičvacca.
Pastaŭščyki strachujuć ryzyki
Tym časam u krainie sfarmavaŭsia «šery» kurs biełaruskaha rubla, jaki na 19% vyšejšy za bankaŭski i składaje 3600 rubloŭ za adzin dalar. Heta infarmacyja raspaŭsiudžvajecca sa spasyłkaj na kampanij-pastaŭščykoŭ arhtechniki. Mienavita taki kurs vykarystoŭvajecca bolšaściu ŭdzielnikaŭ rynku dla pieraafarmleńnia dakumientaŭ na pavyšeńnie cenaŭ. Aptovyja pastaŭki IT-tavaraŭ (manitory, noŭtbuki, drukarki) padaražali na 15–17%, telekamunikacyjnyja tavary (u pryvatnaści, mabilnyja telefony) — na 25–30%. Pry hetym pastaŭki ažyćciaŭlajucca tolki pry 100%-j pieradapłacie.
Patrajeńnie kursaŭ
Hetaja situacyja viartaje Biełaruś u pačatak 2000-ch hadoŭ u krainie isnavali try kursy valuty. Adzin byŭ aficyjny, druhi — na čornym rynku najaŭnaj valuty, treci — dla bieznajaŭnych raźlikaŭ. Ciapierašniaja situacyja abumoŭlenaja niedachopam valuty i devalvacyjnymi čakańniami hramadstva. Usio heta vymahaje ŭžyćcia nadzvyčajnych mieraŭ dla ŭratavańnia finansavaj stabilnaści.
