Staršyni Maładoha frontu Źmitru Daškieviču, jaki asudžany na dva hady pazbaŭleńnia voli, dazvolena raźvitacca z maci, jakaja pamierła ŭ noč na 26 krasavika. Ale supravadžać jaho budzie kanvoj.
Pa słovach namieśnicy staršyni Maładoha frontu Nasty Pałažanki, kab damahčysia prava raźvitacca z samym blizkim čałaviekam, pryjšłosia zrabić vialikuju pracu, ale ŭsio vyrašyłasia amal u apošni momant:
— Źmitra adpuścili na momant raźvitańnia z maci, usiaho dumaju niejkaja hadzinka. Jedzie jon kanvojem, u asobnaj mašynie, pad nahladam i z achovaj. Dla hetaha nam treba było jeździć u Staryja Darohi, u Słuck, paśla treba było ŭsie hetyja dakumienty vieźci ŭ Maskoŭski sud, dzie ja parazmaŭlała z namieśnikam staršyni sudu, a siońnia ja razmaŭlała z načalnikam turmy, i my ŭdakładniali ŭsie momanty, jak jano musić być. Kiraŭnictva SIZA šukała jamu kanvoj i jany vyznačajuć farmaty, jak maje vyhladać raźvitańnie Źmitra z matulaj.
Nasta Pałažanka i jašče niekalki pradstaŭnikoŭ Maładoha frontu taksama nakiravalisia ŭ Staryja Darohi, dzie adbudziecca raźvitańnie z Volhaj Daškievič i jaje pachavańnie. Joj było 54 hady, jana chvareła, navat nie prysutničała na sudzie nad synam. U noč na 26 krasavika ŭ jaje raptoŭna spyniłasia serca.
***
Paŭhadziny Źmicier Daškievič moh znachodzicca ŭ słuckim morhu kala truny svajoj mamy, paviedamiła «Narodnaja vola». Kanvairy pastavili mašynu, u jakoj pryvieźli Źmitra pobač z vychadam.
Baćku i jašče piaci siabram chłopca dazvolili pabyć pobač ź im. Sa Źmitra na hety čas źniali kajdanki i jon moh abniacca ź siabrami i skazać cicha niekalki słoŭ. Paśla hetaha Źmitru nadzieli kajdanki, vyvieli asobna, pasadzili ŭ mašynu i pavieźli ŭ Minsk. Siabry Daškieviča paviazuć cieła jaho maci na staradarožskija mohiłki.
Źmitra Daškieviča pryvozili ŭ Słuck pad kanvojem na troch mašynach. U Starych Darohach niama morha i tamu cieła pamierłaj Volhi Daškievič pryvieźli ŭ słucki morh.
