Palitołah Valer Karbalevič prakamientavaŭ zvarot urada Biełarusi ŭ MVF z prośbaj vydać stabilizacyjny kredyt.
Zvarot u Mižnarodny valutny fond, na dumku sp. Karbaleviča, heta i šantaž Rasii, i adnačasova sproba atrymać hrošy na avoś. «Ułady Biełarusi ŭ biasprojhryšnaj situacyi ŭ dadzienym vypadku, bo ničoha nie hublajuć. Tym bolš, što ekanamičnaja situacyja ŭ krainie sapraŭdy nadzvyčaj składanaja, źviartacca pa dapamohu bolš niama kudy». Pytańnie tolki, ci daść MVF hrošy?
Pa słovach ekśpierta, palityka fondu ŭ dačynieńni da Biełarusi źjaŭlajecca svojeasablivaj «čornaj skryniaj». Zusim niadaŭna ekśpierty MVF davali davoli aptymistyčnyja prahnozy ekanamičnaha raźvićcia Biełarusi na bližejšy hod. I vyhladaje, što ekanamičny kryzis, jaki abrynuŭsia na našu krainu ŭ 2011 hodzie, staŭ dla ich niečakanaściu. Dziŭna i toje, padkreślivaje palitołah, što svaje prahnozy adnosna Biełarusi ekśpierty fondu budavali na asnovie dadzienych, atrymanych ad biełaruskich uładaŭ.
Ekśpiert kaža, što pakul dosyć składana aceńvać šancy Biełarusi na atrymańnie zaprošanaj dapamohi. «Nieviadoma, jakimi matyvami siońnia kirujecca MVF u dačynieńni da Biełarusi. U 2009 hodzie naša kraina atrymała kredyt ad fondu, nie vykanaŭšy asnoŭnych patrabavańniaŭ. Jak budzie ciapier, ciažka skazać, bo zrazumieła, što ZŠA buduć patrabavać najpierš vykanańnia palityčnych umovaŭ — vyzvaleńnia palitźniavolenych».
