Biudžetnikam pačali vypłačvać indeksacyi da zarobkaŭ. Pa 40 tysiač rubloŭ.
U redakcyju «Našaj Nivy» pryjšoŭ list ad čytača z Bresckaj vobłaści. Jon piša, što pracuje ŭ biudžetnaj arhanizacyi, jahonaja žonka taksama. Na dniach atrymali raźlikovyja listy. Jany — rabotniki śfiery kultury i adukacyi. Akazałasia, što abaim da zarobku naličyli indeksacyju ŭ pamiery 40 000 rubloŭ. Čytač piša, što indeksacyja hetaja adnarazovaja. «Na paru ŭpakovak tualetnaj papiery chopić!» — iranizuje jon. Inšy padpisčyk «NN» z Hrodzienščyny paviedamiŭ, što im taksama musiać u bližejšy čas dapłacić pa 40 tysiač rubloŭ, a ŭ nastupnym miesiacy nibyta ažno pa 130 tysiač.
Nahadajem, što pra indeksacyju zarobkaŭ u suviazi z rostam cenaŭ niadaŭna zajaviła ministr pracy i sacyjalnaj abarony Maryjana Ščotkina. Pavodle jaje, heta praduhledžana zakonam ab indeksacyi prybytkaŭ, zhodna ź jakim indeksacyja vypłačvajecca ŭ vypadku rostu cenaŭ bolš čym na 5%. Pamier indeksacyi zaležyć ad biudžetu pražytkovaha minimumu. Biełarusam pačali vypłačvać kampiensacyju ŭ lutym, tady jana składała kala 15 tysiač rubloŭ. Ciapier, z ulikam rostu BPM, pamier indeksacyi składaje kala 25 tysiač. U sumie majem troški bolš za 40 tysiač. Pa kursie Nacbanka na siońnia heta składaje kala 8 dalaraŭ.
Tym časam, siaredni zarobak biełarusaŭ u krasaviku 2011 hoda skłaŭ kala 317$ (u śniežni 2010-ha — 475$). Takim čynam, hrašovyja straty siaredniaha biełarusa ad padzieńnia zarobkaŭ amal u 20 razoŭ pieravyšajuć prapanavanuju dziaržavaj indeksacyju.
