Na admysłovaj pres‑kanferencyi lider Partyi BNF Vincuk Viačorka raspavioŭ pra vyniki ŭdziełu partyi ŭ miascovych vybarach. Jon čarhovy raz padkreśliŭ , što abjadnanaja apazycyja vykarystała vybary vyklučna jak nahodu čarhovy raz painfarmavać nasielnictva. «My nie ŭsprymali i nie ŭsprymajem toje, što adbyłosia, jak vybary» – padkreśliŭ lider partyi.
Sioletnija vybary ŭ miascovyja saviety prajšli z tradycyjnymi parušeńniami zakanadaŭstva, adznačyŭ sp.Viačorka. Adnak, na jaho dumku, «ułady i padkantrolnyja im specsłužby dziejničali nieadekvatna žorstka». «Napiaredadni vybaraŭ i ŭ časie kampanii supracoŭniki KDB akazvali cisk na niezaležnych kandydataŭ, ich davieranych asobaŭ, aktyvistaŭ i ahitataraŭ» – kaža lider BNF. Asabliva pakazalnym jość incydent ź lideram moładzievaha kryła partyi Alesiem Kalitom, jakoha pry zatrymańni mocna źbili, a potym asudzili na 7 sutak aryštu.
Adnak systema časam daje zboi ‑‑ niekalki demakratyčnych kandydataŭ usio ž atrymali na hetych vybarach pieramohu. Vincuk Viačorka adznačyŭ pracu niezaležnych naziralnikaŭ, asabliva padčas papiaredniaha hałasavańnia: «Zatrymańni ŭ Horadni pakazali, što ŭłady pa‑raniejšamu bajacca niezaležnaha nazirańnia». Pa jaho słovach, naziralnikami zafiksavanyja niekalki vypadkaŭ hrubaha parušeńnia vybarčaha zakanadaŭstva. Tak, u Voršy staršynia adnaho z vybarčych učastkaŭ byŭ zaśpiety ŭnačy ź nieaplambavanaj skryniaj, u Biełaaziorsku niezaležnyja naziralniki zafiksavali načnuju pracu na adnym z vybarčych učastkaŭ.
Kažučy pra asabisty ŭdzieł u vybarach, V. Viačorka raspavioŭ pra padazronaje skaračeńnie kolkaści svaich prychilnikaŭ – na minułych parlamenckich vybarach jon sabraŭ na svaim učastku ŭ niekalki razoŭ bolš podpisaŭ, čym ciapier hałasoŭ.
Pa słovach palityka, abyvatalaŭ pa‑raniejšamu nie cikaviać miascovyja prablemy, što paćviardžaje słušnaść abranaj partyjaj stratehii na hetyja vybary. «Ludziej cikaviać hlabalnyja pytańni: što budzie dalej, jakija košty ŭstalujucca na kamunalnyja pasłuhi, ci budzie abvał rubla» – padkreśliŭ Viačorka.
Jon nia maje pakul dakładnych źviestak pra mahčymuju kolkaść delehataŭ ad partyi na budučy Kanhres demakratyčnych siłaŭ. Pry hetym sp. Viačorka pieraściaroh: «Kali na budučym Kanhresie nia budzie zrobleny akcent na ekanamičnych prablemach, što cikavić biełarusaŭ, a pačniecca baraćba aŭtarytetaŭ – usia našaja apazycyja kančatkova marhinalizujecca». Bo, pa nazirańniach palityka, vybarcaŭ nie cikaviać taksama i ŭnutranyja prablemy apazycyi, ad jaje čakajuć dziejańnia.
