«Čamu ŭźnikła takoje žadańnie?» — «Dla destabilizacyi abstanoŭki ŭ Respublicy Biełaruś» repartaž karespandenta NN z zały suda 49

13.00–13.42

Začytvajecca nastupny pratakoł dopytu Kanavałava ŭ časie śledstva.

13.04.2011 (druhi pratakoł dopytu za hety dzień). Dopyt pravodziŭ namieśnik hienprakurora Švied.

Pa stanie zdaroŭja Kanavałaŭ paprasiŭ pieranieści dopyt. Pryčyna?

«Drennaje samaadčuvańnie. Usio balić, bo piŭ harełku». Dopyt prypynieny, a paśla ahladu miedykam adnoŭleny.

«Ja prynios sumku. Ustanaviŭ i zrabiŭ padryŭ vybuchoŭki na pieronie». «Ja heta zrabiŭ adzin» — «Dla čaho?» «Dla destabilizacyi abstanoŭki ŭ krainie». «Navošta?» — «Pasiejać paniku i strach».

Rečyva dla vybuchoŭki Kanavałaŭ zrabiŭ šlacham spłaŭleńnia amijačnaj saletry z utrapinam.

«Dla čaho vam patrebna była destabilizacyja?» — «Ničoha asabistaha, nijakich kryŭdaŭ. Ja nie budu adkazvać na pytańnie».

«Dla čaho vykarystali takuju vialikuju vybuchoŭku?» — «Dla maksimalnaha paražajučaha efiekta». — «Vy stavili za metu zabić jak maha bolš ludziej?» — «Tak».

Ad 14 da 17 mm byli šaryki, jakija Kanavałaŭ vykarystoŭvaŭ u vybuchoŭcy. Sorak takich šarykaŭ uziaŭ na pracy.

Padčas pierachodu z «Kupałaŭskaj» na «Kastryčnickuju» 11 krasavika 2011 Kanavałaŭ pryvioŭ u bajavy stan vybuchoŭku. Dla hetaha tre było złučyć pravady.

Abvieščany pierapynak da 14.45.

12.40–12.59

Advakat Kanavałava zajaviŭ, što ŭ pratakole dopytu zapisana ŭ formie volnaha apaviadańnia. Na videa — usio ŭ dyjałohu. Na videa nie adlustravana, na jakoje abstalavańnie zrobleny zapis. Pierad pačatkam videa nie zroblena papiaredžańnie Kanavałavu, što viadziecca videazdymka. Sudździa nie dazvoliŭ vykazacca abodvum advakatam da kanca. Maŭlaŭ, buduć sprečki jašče, tady mohuć usio vykazać.

Začytvajecca čarhovy pratakoł dopytu Kanavałava na papiarednim śledstvie.

Pytajucca pra vybuch u padjeździe, padvał humovaha dyvanka ŭ padjeździe ŭ 2001 hodzie.

U hetym pratakole Kanavałaŭ skazaŭ, što pa pryjeździe 10 krasavika 2011 hoda ŭ Minsk Dźmitryj paviedamiŭ Kavalovu, što ŭ sumcy vybuchoŭka. Na vulicy Kavaloŭ zazirnuŭ u torbu. Vybuchoŭka była nakryta padarunkavaj abhortkaj. Na vypadak, kali Kanavałava spynili b milicyjanty. Maŭlaŭ, padarunak viazie.

Padčas pićcia harełki na zdymnaj kvatery 10 krasavika Kanavałaŭ pakazaŭ knopku, z dapamohaj jakoj źbiraŭsia ździejśnić vybuch. Kavaloŭ pačaŭ ciskać na jaje, navat nie spytaŭšysia, ci nie padłučana jana.

Paśla pajechaŭ ahledziecca ŭ mietro. Najlepšaje miesca vybraŭ pad łavaj, dzie ŭ vyniku i pastaviŭ paśla vybuchoŭku. Kanavałaŭ nie staŭ tłumačyć, čamu jon prachiały čas chadziŭ pa pieronie stancyi «Kastryčnickaja» pierad kamierami, chacia viedaŭ pra ich.

Na 20.00 10 krasavika była pryznačana sustreča ź Janiaj Pačyckaj.

Kanavałaŭ zajaviŭ, što 11 krasavika ŭžo nie piŭ śpirtnoha. Kali Kanavałaŭ padyšoŭ da sumki, da jaho padyšoŭ i Kavaloŭ. Apošni bačyŭ, jak Kanavałaŭ padklučaŭ draty. U hety momant zazirnuła Pačyckaja. Kanavałaŭ skazaŭ, kab jana vyjšła. Jana pasłuchała. «Kavaloŭ mnie pažadaŭ pośpiechu. Uład mianie nie adhavorvaŭ nie ŭzryvać stancyi».

Čamu raniej Kanavałaŭ kazaŭ, što Kavaloŭ nie viedaŭ pra vybuchoŭku? «Śpiecyjalna vyharodžvaŭ Kavalova», kab siabra nie pryciahnuli da adkaznaści. Raskazvać pačaŭ tolki tamu, što sam Kavaloŭ pačaŭ raskazvać pra heta. Kali b Kavaloŭ maŭčaŭ, pa słovach Kanavałava, jon by sam nie vydaŭ. Pra pakazańni Kavalova Kanavałaŭ daviedaŭsia z vypisak jaho dopytaŭ i na vočnaj staŭcy.

11.11–12.39

Pačaŭsia dopyt Kanavałava. Jon admoviŭsia davać pakazańni. Pryčynu patłumačyŭ minimalna — «karystajecca svaim pravam» nie davać pakazańniaŭ suprać siabie.

Ahałošvajucca pakazańni Kanavałava na papiarednim śledstvie. Kanavałaŭ adrazu admoviŭsia adkazvać na pytańni i paśla ahałošvańnia jaho raniejšych pakazańniaŭ.

Z pakazańniaŭ Kanavałava 13.04.2011, začytvajecca ŭ sudzie.

Kala 17.00 11 krasavika Dźmitryj spuściŭsia ŭ mietro na stancyi «Frunzienskaja». Dajechaŭ da «Kupałaŭskaj», pierajšoŭ na «Kastryčnickuju». Pastaviŭ pad adnoj z łavak sumku z vybuchoŭkaj.

Dla vybuchoŭki kupiŭ u Viciebsku piać pakietaŭ pa 2 kh saletry i inšyja rečyvy. Zrabiŭ vybuchoŭku ŭ siabie na viciebskaj kvatery za 3 dni.

Schiemu dla vybuchoŭki znajšoŭ u internecie. Na jakim sajcie, nie pamiataje.

Pryznaje, što 3 lipienia 2008 hoda ździejśniŭ vybuch u Minsku. Spačatku zakłaŭ adnu vybuchoŭku. Paśla viarnuŭsia na zdymnuju kvateru, uziaŭ druhuju vybuchoŭku i ŭstalavaŭ.

Pryznaje, što ŭ Viciebsku ździejśniŭ vybuchi. Meta — destabilizacyja abstanoŭki ŭ krainie.

Demanstrujecca videa z začytanaha dopytu.

Hołas Kanavałava na videa cichi, nievyrazny.

Admoviŭsia ad biaspłatnaj jurydyčnaj kansultacyi da pačatku dopytu.

Pra 11 krasavika 2011 hoda raskazvaje jak pad dyktoŭku — ź vialikimi paŭzami jak zavučany tekst. Raskazvaje mała, apuskajučy padrabiaznaści. Pryjechaŭ z vybuchoŭkaj. Sieŭ u mietro. Dajechaŭ da stancyi «Kastryčnickaja». Pakłaŭ sumku kala łaŭki. «I ździejśniŭ vybuch». «Jakim čynam?» — «Nacisnuŭ na knopku».

Z čaho składałasia vybuchovaje prystasavańnie, jakim čynam pryvadziłasia ŭ dziejańnie, dzie ŭziali kampanienty?» «Kupiŭ u kramie saletru (na vulicy 30-j Armii)…" Mietaličnyja šaryki, žaleznaja armatura, ćviki taksama ŭvachodzili ŭ skład vybuchoŭki. Nabyvaŭ ich u kramie budmateryjałaŭ (dzie znachodzicca krama — nie pamiataje). «Vyrablaŭ sam vybuchoŭku. Z metaj ździajśnieńnia vybuchu». — «Čamu ŭźnikła takoje žadańnie?» — «Dla destabilizacyi abstanoŭki ŭ Respublicy Biełaruś».

Pa telefonie 9 krasavika Kanavałaŭ nie kazaŭ Kavalovu pra metu pryjezdu ŭ Minsk.

10 krasavika pryjechaŭ na ciahniku Viciebsk-Minsk, prybyćciom 10.53. Sustreŭ «siabar Uład». Paśla pajechali źniać kvateru. Na kvateru pryjšła siabroŭka Jania Pačyckaja. Paznajomilisia praz Vkontaktie. Raśpivali śpirtnoje. Jana pryjechała adna. Schadzili ŭ kramu. Kupili śpirtnoje i pajšli na kvateru. Pačali vypivać. Paśla lahli spać.

Jana bačyła sumku, ź jakoj pryjechaŭ Kanavałaŭ. Pra jaje načyńnie dziaŭčyna nie viedała. Jana i Uładzisłaŭ nie pytalisia, što ŭ sumcy. I sam Kanavałaŭ ničoha nie kazaŭ (na dopycie na papiarednim śledstvie Kavaloŭ zajaviŭ, što Kanavałaŭ jašče na vakzale skazaŭ, što pryvioz vybuchoŭku. Hetyja pakazańni, pa zajavie Kavalova, byli dadzieny im pad ciskam).

(U movie Kanavałava na videazapisie prysutničajuć kazionnyja vyrazy, nieŭłaścivyja zvyčajnaj havorcy rabočaha, takija jak «raśpivać śpirtnyja napoi», «destabilizacyja abstanoŭki», «vybuchovaje prystasavańnie». Pa niekalki razoŭ raskazvaje adno i toje ž, nie raskryvajučy detalaŭ.)

Kala 17-j hadziny 11 krasavika zajšoŭ na stancyju «Frunzienskaja». Dajechaŭ da «Kupałaŭskaj». Spuściŭsia na druhuju liniju — na stancyju «Kastryčnickaja». Jechaŭ z metaj ździejśnić vybuch. «Čamu vybrali hetu stancyju?» — «Na joj było bolš ludziej».

Schiemu dla vybuchoŭki znajšoŭ miesiacy za dva da vybuchu. Na jakim sajcie, nie pamiataje. «Razumieŭ, što rabiŭ». — «Dla čaho?» — «Dla destabilizacyi abstanoŭki ŭ Respublicy Biełaruś».

«Ci ździajśniaŭ inšyja złačynstvy?» — «Ździejśniŭ vybuch na Dzień Niezaležnaści».

Pryjšoŭ na śviata kala 23-j hadziny 3 lipienia 2008 hoda. Zakłaŭ vybuchoŭku nasuprać hatela «Płanieta». Pastaviŭ budzilnik u vybuchoŭku. Paśla čaho adyšoŭ. Na vybuchoŭcy byŭ tumbler, jaki zapuskaje hadzińnik. Vybuch pavinien byŭ adbycca praź dziesiać chvilin. Paśla pajšoŭ na kvateru pa druhuju vybuchoŭku. Ustalavaŭ nasuprać steły, praz darohu ad pieršaj. «Čamu adrazu dźvie nie ŭziaŭ?» — «Było składana pranieści». Vybuchoŭki byli adnolkava vyrableny, roźnilisia tolki vahoj.

Zajaviŭ, što ździejśniŭ dva vybuchi ŭ Viciebsku. Pieršy vybuch — na prapynku hramadskaha transpartu. Prynios na prypynak blašanku ad piva, u jakoj była dypierakis acetonu, samarezy, «paražajučyja elemienty». Schiemu dla vybuchoŭki znajšoŭ u internecie. «Ź jakoj metaj ździajśniali?» — «Kab destabilizavać abstanoŭku ŭ Viciebsku».

11.00–11.11

Čaćviorty dzień sudovaha pracesu pa spravie Kanavałava-Kavalova.

Ludziej, jak i ŭ papiaredni dzień mała.

Pytańni Kavalovu zadaje sudździa. Uładzisłaŭ nie viedaje, jakija metyŭ žyćci stavić.

Sudździa: Pra jakija epizody z abvinavačvańniaŭ Kanavałavu vy dakładna viedajecie i ŭ jakich udzielničaŭ razam z Kanavałavym? — Udzielničali va ŭzryvańni škła ŭ 2002 hodzie.

Kavaloŭ skazaŭ, što byŭ vypadak, kali Kanavałaŭ parezaŭ sabie vieny. 2007 ci 2008 hod. Pazvaniŭ Kavalovu. Uładzisłaŭ pryjechaŭ da jaho. Pieraviazali ruki. Na nastupny dzień schadzili da chirurha.

Začytvajucca pakazańni Kavalova na papiarednim śledstvie, 23.04.2011 (śledčy Varonin).

* * *

Dźmitryju Kanavałavu pradjaŭlena abvinavačańnie va ŭčynieńni teraryzmu, jaki ŭ tym liku paciahnuŭ čałaviečyja achviary, pryčynieńnie cialesnych paškodžańniaŭ roznaj stupieni ciažkaści, inšyja ciažkija nastupstvy, u niezakonnych dziejańniach u dačynieńni da vybuchovych rečyvaŭ i vybuchovych pryład, złosnaha i asabliva złosnaha chulihanstva, naŭmysnaha źniščeńnia i paškodžańnia majomaści ahulnaniebiaśpiečnym sposabam.

Uładzisłavu Kavalovu pradjaŭlena abvinavačańnie ŭ saŭdziele ŭ formie dapamahańnia i ŭčynieńni teraryzmu, učynieńni złosnaha i asabliva złosnaha chulihanstva, naŭmysnym źniščeńni majomaści ahulnaniebiaśpiečnym sposabam, u niezakonnych dziejańniach u dačynieńni da vybuchovych rečyvaŭ, ukryvalnictvie asoby, jakaja ŭčyniła asabliva ciažkaje złačynstva, i niedaniasieńni ab učynienych i padrychtoŭcy asabliva ciažkich złačynstvaŭ.

Vybuch na stancyi «Kastryčnickaja» minskaha mietro adbyŭsia 11 krasavika. 15 čałaviek zahinuli, bolš za 160 atrymali traŭmy, u tym liku ciažkija.

Jak paviedamiŭ žurnalistam 1 žniŭnia namieśnik hienprakurora — načalnik śledčaha ŭpraŭleńnia Hienprakuratury Andrej Švied, Kavalovu inkryminujecca bolš za 15 epizodaŭ złačynnaj dziejnaści, Kanavałavu — 30. U pracesie rasśledavańnia kryminalnaj spravy, apierytyŭna-vyšukovych mierapryjemstvaŭ nie było vyjaŭlena ŭskosnych śviedčańniaŭ taho, što za śpinoj abvinavačvanych stajali jakija-niebudź sponsary abo zakazčyki. «Kanavałaŭ i Kavaloŭ dziejničali samastojna», — skazaŭ Švied.

NN.BY

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH