22 vieraśnia sudździa suda Centralnaha rajona Homiela Maryna Damnienka pryznała apazicyjaniera Kanstancina Žukoŭskaha vinavatym va ŭčynieńni pravaparušeńniaŭ, praduhledžanych artykułami 17.1 i 23.4 KoAP (niecenzurnaja łajanka ŭ hramadskim miescy i niepadparadkavańnie patrabavańniam supracoŭnikaŭ milicyi). Pa rašeńni suda 15 sutak apazicyjanier praviadzie ŭ IČU.
Nahadajem, Žukoŭski byŭ zatrymany viečaram 21 vieraśnia. Na skryžavańni vulic Knižnaj i Telmana na jaho raptoŭna nakinulisia supracoŭniki śpiecnaza i z prymianieńniem hrubaj fizičnaj siły zašturchali ŭ słužbovy aŭtamabil. Vierahodna, aktyvist atrymaŭ pry hetym traŭmy, bo nočču jaho dastaŭlali ŭ abłasnuju balnicu. Minułuju noč jon pravioŭ u IČU.
Zhodna ź milicejskim pratakołam, Žukoŭski 21 vieraśnia prykładna ŭ 18.25 na vulicy Telmana niecenzurna łajaŭsia, na zaŭvahi milicyjanieraŭ nie reahavaŭ, a pry sprobie spynić supraćpraŭnyja dziejańni akazaŭ niepadparadkavańnie milicyi.
Supracoŭniki pałka milicyi śpiecyjalnaha pryznačeńnia Siarhiej Mitčanka, Andrej Juranaŭ i Alaksandr Miadźviedzieŭ pakazali na sudzie, što 21 vieraśnia prykładna z 17.00 pa zahadzie načalnika adździeła hramadskaha paradku Čyhunačnaha RAUS majora Alaksandra Košmana čakali Žukoŭskaha kala jaho doma, kab uručyć jamu pozvu. Pavodle słoŭ milicyjanieraŭ, jany sustreli aktyvista na vulicy Telmana, sprabavali ŭručyć pozvu, ale Žukoŭski pačaŭ łajacca matam, akazaŭ im supraciŭleńnie, sarvaŭ ź milicyjanieraŭ bedžy i racyi. Pavodle słoŭ milicyjanieraŭ, apazicyjanier pavodziŭ siabie nieadekvatna. «Jon pahražaŭ nam, našym siemjam, usio havaryŭ ab niejkaj ilustracyi», — zajaviŭ u sudzie Siarhiej Mitčanka.
Aktyvist nie pryznaŭ, što łajaŭsia matam i nie padparadkoŭvaŭsia milicyjanieram.
