Padatak za zdaču žylla ŭ najom prapanujecca z 2012 hoda surjozna pavialičyć. Vakoł prapanovy na pasiadžeńni Savieta ministraŭ u aŭtorak razharnułasia dyskusija. Z adnaho boku, padatak moža stać dadatkovym ciažaram dla arandataraŭ, siarod jakich niamała pradstaŭnikoŭ nie samych bahatych katehoryj nasielnictva, maładych siemjaŭ, studentaŭ. Ź inšaha — uładalniki kvater, jakija zdajuć svajo žyllo ŭ arendu, atrymlivajuć prystojny prybytak, pryčym časta ŭ valucie, i im całkam pa siłach padzialicca ź biudžetam.
Pa Mmnsku prapanavanaja suma padatku składaje ad 75 tysiač da 300 tysiač rubloŭ u miesiac kožny pakoj, jaki zdajecca U Breście za pakoj u miesiac prapanujecca zapłacić padatak u pamiery ad 30 da 150 tysiač, u Viciebsku — ad 45 tysiač rubloŭ.
Udzielniki pasiadžeńnia zasumniavalisia ŭ abhruntavanaści novych stavak, vykazaŭšy zdahadku, što nieabchodnaść płacić za zdaču ŭ arendu trochpakajovaj kvatery padatak u pamiery da 900 tysiač rubloŭ moža zahnać hety biznes u cień.
«Na moj pohlad, hety biznes i tak uvieś u cieni»,— paryravaŭ ministr finansaŭ Andrej Charkaviec. Jon pryznaŭ, što tema dalikatnaja, i namacać bałans vielmi składana, paabiacaŭšy papracavać nad dadatkovym abhruntavańniem pavieličeńnia padatku.
Staršynia Minharvykankama Mikałaj Ładućka prapanovu Minfina padtrymaŭ, adznačyŭšy, što košt arendy kvatery ŭ Minsku dasiahaje 1000 dalaraŭ u miesiac (abuładkavanaja kvatera z meblaj ŭ centralnaj častcy horada płoščaj da 100 kv m). «900 tysiač rubloŭ padatku — heta 100 dalaraŭ. Siońnia taksama hradacyja jość, i kali pryviazvacca da kursu dalara, to faktyčna dla bolšaści ŭładalnikaŭ žylla heta tyja ž vydatki», — dadaŭ Ładućka, rastłumačyŭšy, što maksimalnaja staŭka budzie raspaŭsiudžvacca na nievialikuju kolkaść darahich kvater u centry. Pavodle jaho słoŭ, padatak za pakoj u šarahovaj kvatery ŭ panelnym domie budzie kala 100 tys rubloŭ (suprać 35 tysiač sioleta), što ŭ dalaravym ekvivalencie nie vyšej za ŭzrovień pačatku hoda.
Jamu nahadali, što zarobki i stypiendyi ŭ Biełarusi vypłačvajucca nie ŭ dalarach. Padobna na toje, dyskusija budzie praciahnutaja.
