— Ja čuŭ, što ŭsich, chto pryhnaŭ sioleta mašynu, vyklikajuć u padatkovuju, — datelefanavaŭsia ŭ redakcyju «Kamsamołki» čytač z Pružanaŭ. — Ja na svaju «Tajotu» dva hady źbiraŭ, potym u siabroŭ pazyčaŭ, kab paśpieć dy pavyšeńnia rastamožki. I što ciapier?
Tolki sa studzienia pa vierasień biełarusy zavieźli ŭ krainu bolš za 260 tysiač mašyn.
— Usich, chto kupiŭ mašyny, u padatkovyja orhany vyklikać nie buduć. Kantrol za adpaviednaściu raschodaŭ i dachodaŭ padatkovyja orhany ažyćciaŭlali i raniej. U Biełarusi z 2003 hoda dziejničaje zakon ab dekłaravańni dachodaŭ i majomaści. Analiz infarmacyi pravodzicca ŭ dačynieńni da tych hramadzian, jakija, da prykładu, atrymlivajuć nievialikuju zarpłatu abo doŭhi čas nidzie nie pracujuć, ale pry hetym kuplajuć darahi aŭtamabil, nieruchomaść, — prakamientavaŭ situacyju namieśnik načalnika hałoŭnaha ŭpraŭleńnia padatkaabkładańnia fizičnych asob Ministerstva pa padatkach i zborach Michaił Rasolka.
— Heta značyć, usie źviestki pra pakupnikoŭ mašyn adrazu iduć u padatkovuju?
— Nie. Ale padatkovyja orhany mohuć atrymać takuju infarmacyju, kali im heta nieabchodna.
— Praz toje, što sioleta biełarusy kupili mašyn amal u try razy bolš, čym raniej, uvaha da aŭtaŭładalnikaŭ u padatkovaj pavysiłasia?
— Ja b tak nie skazaŭ. Kali čałaviek maje dastatkovy aficyjny dachod i kupiŭ aŭtamabil, to nijakich pytańniaŭ da jaho nie było ni raniej, ni ciapier.
— Kažuć, što supracoŭniki padatkovych orhanaŭ chodziać pa pryvatnym siektaru i hladziać, u kaho pabudavanyja vialikija damy, stajać darahija mašyny. Heta tak?
— Padatkovyja orhany ažyćciaŭlajuć rejdavyja mierapryjemstvy, u tym liku pa vyjaŭleńni niezarehistravanaj dziejnaści ŭ pryvatnym siektary — nielehalnyja STA, ramontnyja raboty, handal. Viadoma, padčas takich mierapryjemstvaŭ mohuć uźniknuć pytańni pra toje, naprykład, kamu naležyć niejkaje vialikaje zbudavańnie. Ale śpiecyjalna ŭ kožnuju kvateru abo kožny dvor nichto nie zachodzić.
Što rabić pakupniku aŭto, jakoha vyklikali ŭ padatkovuju?
U pieršuju čarhu nie panikavać! Mahčyma, padatkovaja prosta nie ŭ kursie, što vy brali na svaju kuplu kredyt. Abo siabry mohuć dać raśpiski pra toje, što pazyčyli vam hrošaj.
U tym vypadku, kali pakupnik nie moža dakazać, što hrošy jon zarabiŭ zakonnym sposabam, a nie atrymlivaŭ, da prykładu, zarobak u kanviercie, jamu vystaviać da vypłaty padatak (u kaznu treba budzie vypłacić 12% ad sumy pieravyšeńnia vydatkaŭ nad prybytkami).
