Rasijskich «čarnasociencaŭ» razdražniaje restaŭracyja biełaruskich zamkaŭ 69

Na raźvićcio śfiery kultury Hrodzienskaj vobłaści ŭ 2012 hodzie z abłasnoha i respublikanskaha biudžetaŭ nakirujuć kala Br110 młrd. Ab hetym u Hrodnie paviedamiŭ ministr kultury Biełarusi Pavieł Łatuška, jaki pryniaŭ udzieł u vynikovaj kalehii ŭpraŭleńnia kultury Hrodzienskaha abłvykankama, pieradaje BIEŁTA.

Značnyja srodki buduć nakiravanyja na adnaŭleńnie abjektaŭ historyka-kulturnaj spadčyny. U ramkach prahramy «Zamki Biełarusi» ŭ 2012 hodzie sa srodkaŭ respublikanskaha i abłasnoha biudžetaŭ praduhledžana finansavańnie restaŭracyi unikalnych Kreŭskaha, Halšanskaha, Lidskaha zamkaŭ i inšych abjektaŭ.

Na hetuju navinu chutka adreahavaŭ sajt regnum.by, filija rasijskaha «impierskaha» sajta regnum.ru. Maŭlaŭ, «ministierstvo kultury Biełoruśsii» budzie adnaŭlać litoŭskija i polskija zamki.

Dalej idzie karotkaja histaryčnaja daviedka adnosna hetych zamkaŭ i postaciej, što byli ź imi źviazanyja: Mindoŭh, Hiedymin, Jahajła. Naprykład, apošniaha abvinavačvajuć u tym, «što staŭšy polskim karalom, ŭziaŭ na siabie abaviazki raspaŭsiudzić katalicyzm va ŭsich svaich uładańniach, u tym liku ruskija ziemli (terytoryja ciapierašniaj Biełarusi)».

U Lidskim ža zamku žyŭ «zaklaty niedruh» Vialikaha kniastva Maskoŭskaha chan Daŭlet-Chadžy Hirej.

A padčas padziej 1794 u Lidzie ad rasijskich vojskaŭ adbivaŭsia atrad Tadevuša Kaściuški, jaki «zmahaŭsia za adnaŭleńnia Polščy ŭ miežach 1772 hoda». Karatkievič nazyvajecca «savieckim», a nie biełaruskim piśmieńnikam.

«Ministerstva kultury Biełarusi nadaje asablivuju ŭvahu adnaŭleńniu pomnikaŭ, jakija nahadvajuć pra časy Vialikaha kniastva Litoŭskaha i Rečy Paspalitaj. Saviet ministraŭ Biełarusi pastanovaj № 17 ad 6 studzienia zaćvierdziŭ dziaržaŭnuju prahramu «Zamki Biełarusi» na 2012–2018 hady, u ramkach jakoj praduhledžany restaŭracyja i adnaŭleńnie zamkaŭ polskich mahnataŭ», — piša regnum.by.

Taksama sajt nahadvaje, što ŭ 2004 hodzie ŭłady Biełarusi adnavili siadzibu Kaściuški ŭ Kosavie (Bresckaja vobłaść). «Siadziba Kaściuški była spalenaja ŭ žniŭni 1942 hoda biełaruskimi partyzanami. Na adnaŭleńnie siadziby (pa malunkach XIX st.) i arhanizacyju muzieja Tadevuša Kaściuški byli vydatkavanyja hrošy biełaruskaha dziaržbiudžetu, a taksama hrant urada ZŠA».

Vyhladaje, što aŭtaram sajta bolš chaciełasia, kab Ministerstva kultury vyłučała hrošy na artefakty rasijskaj prysutnaści ŭ Biełarusi, a tut vychodzić nie pa-ichnamu.

Źmicier Pankaviec

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH