Udava źnikłaha žurnalista Źmitra Zavadskaha Śviatłana Zavadskaja źviarnułasia ŭ Saviet ministraŭ. Jana prapanuje pryniać i ratyfikavać Mižnarodnuju kanviencyju dla abarony ad hvałtoŭnych źniknieńniaŭ, pryniatuju ŭ śniežni 2006 hoda. Razam ź joj zvarot padpisali Siaržuk Bachun i Raman Kiślak.
26 sakavika 2012 hoda pačała pracu druhaja siesija Kamitetu AAN pa hvałtoŭnym źniknieńniam, tym časam Biełaruś dahetul nie padpisała i nie ratyfikavała Kanviencyju, adznačajecca ŭ zvarocie.
Padpisanty zvarotu padkreślivajuć, što prytrymlivajucca mierkavańnia tych, chto ličyć, što Kanviencyja dziaržavy padpisvajucca nie tamu, što ŭ ich pytańnie źniknieńniaŭ aktualnaje abo nieaktualnaje, a tamu, što hetyja dziaržavy, jak cyvilizavanyja nacyi asudžajuć takuju praktyku ŭ pryncypie, dzie b heta nie adbyvałasia.
Aŭtary zvarotu prosiać daručyć ministru zamiežnych spraŭ padpisać Mižnarodnuju kanviencyju dla abarony ad hvałtoŭnych źniknieńniaŭ i ŭnieści ŭ parłamient zakonaprajekt pa jaje ratyfikacyi.
Pravaabaroncy adznačajuć, što prablema hvałtoŭnych źniknieńniaŭ dla Biełarusi aktualnaja. U 1999 hodzie ŭ krainie źnikli eks-ministr unutranych spraŭ Juryj Zacharanka, vice-śpikier Viarchoŭnaha Savieta XIII sklikańnia Viktar Hančar, a taksama pradprymalnik Anatol Krasoŭski. U 2000 hodzie biasśledna źnik žurnalist Dźmitryj Zavadski.
U razhar palityčnych kampanij aktyvistaŭ apazicyi nieadnojčy zatrymlivali asoby ŭ cyvilnym i vyvozili za miežy horada.
