Пачнецца рэканструкцыя Нацыянальнага аэрапорта «Мінск» 3

Рэканструкцыю Нацыянальнага аэрапорта Мінск плануецца пачаць сёлета.

Аб гэтым 29 верасня на прэс-канферэнцыі паведаміў начальнік упраўлення стратэгічнага развіцця, каардынацыі і інвеставання транспартных сістэм Міністэрства транспарту і камунікацый Павел Бажанаў.

Ён адзначыў, што крэдытную лінію пад праект павінен выдзеліць «Эксімбанк» Кітая. Падрадчыкам з кітайскага боку вызначана Усекітайская імпартна-экспартная карпарацыя дакладнага машынабудавання. Цяпер у Кітаі знаходзіцца дырэктар дэпартамента па авіяцыі Вадзім Мельнік, які абмяркоўвае пытанні падпісання кантракта, пасля чаго можна будзе гаварыць аб адкрыцці крэдытнай лініі.

Паводле слоў Бажанава, «Эксімбанку» будуць прадстаўлены таксама дакументы па крэдытаванні іншых праектаў, якія запланаваны ў Беларусі з удзелам кітайскіх крэдытаў.

Як адзначыў прадстаўнік Мінтранса, падрыхтоўчыя работы па рэканструкцыі інфраструктуры Нацыянальнага аэрапорта «Мінск» ужо вядуцца. «Прадстаўнікі кітайскай карпарацыі прыязджалі да нас, была агледжана тэрыторыя, цяпер вядуцца перадпраектныя напрацоўкі. Як толькі будзе адкрыта крэдытная лінія, пачнецца непасрэдная рэалізацыя праекта. Мы спадзяемся, што ўжо сёлета пачнуцца канкрэтныя дзеянні па рэканструкцыі аэрапорта», — сказаў Бажанаў.

Паводле яго слоў, цяпер усё залежыць ад кітайскага боку і, у прыватнасці, ад таго, як хутка ён зможа аформіць крэдыт. Кітайскае заканадаўства «прадугледжвае дакладны і доўгі разгляд такіх дакументаў». «З нашага боку ўсё гатова, справа за кітайскім бокам. Адкрыецца фінансаванне — і пачнуцца актыўныя работы», — падкрэсліў прадстаўнік Мінтранса.

Двухбаковым пагадненнем па гэтым праекце прадугледжаны рэканструкцыя дзейнага аэравакзальнага комплексу, стварэнне міжнароднага пасажырскага тэрмінала, абсталяванне аэрапорта сістэмамі бяспекі і абвяшчэння, будаўніцтва другой узлётна-пасадачнай паласы з магчымасцю прыёму самалётаў Airbus А380.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ