У Цэнтральным універсальным магазіне Магілёва злодзей абчысціў касу актуальнага перад святамі аддзела навагодніх цацак.
Здарэнне адбылося каля 6-й гадзіны вечара — у самы час-пік, калі ідзе вялікі наплыў пакупнікоў, і прадаўцы літаральна разрываюцца паміж імі. Мужчына нібыта зацікавіўся навагоднімі паштоўкамі, скарыстаў момант, калі прадавачка адвярнулася, і свабодна забраў з касы істотную суму — 1 мільён 385 тысяч рублёў.
Пакупнікі паведамілі прадаўцу непрыемную навіну, і жанчына кінулася наўздагон. Усе шанцы ў яе былі, таму што ў злодзея была верная прыкмета — загіпсаваная нага і мыліцы. Якраз у гэты момант каля ўнівермага праходзілі ахоўнікі парадку, і прадавачка звярнулася да іх з гарачай просьбай паспяшацца і адшукаць злодзея.
Літаральна ў сотні метраў чалавека на мыліцах затрымалі. Ім аказаўся 29-гадовы жыхар Магілёва, якога раней судзілі аж 8 разоў і які цяпер адбываў пакаранне за крадзеж на «хіміі». Пры маладым чалавеку былі грошы, скрадзеныя з «навагодняга» аддзела.
Звязда
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
