Partyja BNF źvierniecca ŭ Administracyju prezidenta z patrabavańniem pravieści hramadskija słuchańni pa pytańni raźmiaščeńnia ŭ Biełarusi rasijskaj vajennaj bazy. Pra heta było zajaŭlena 27 lipienia na pasiadžeńni sojma partyi ŭ Minsku.
«U vypadku admovy my budziem inicyjavać praviadzieńnie niefarmalnych słuchańniaŭ, kudy zaprosim vajennych i ekśpiertaŭ»,-- skazaŭ lidar partyi Alaksiej Janukievič.
Taksama Partyja BNF vyrašyła padavać zajaŭki na praviadzieńnie pikietaŭ z metaj vykazvańnia pratestu suprać raźmiaščeńnia ŭ Biełarusi rasijskaj vajennaj bazy.
«Navat kali ŭłady nie dazvolać ich pravieści, sam fakt źviartańnia budzie infarmacyjnaj nahodaj, kab raskazać ludziam ab prablemie», — zaznačyŭ Janukievič.
Jak paviedamlałasia raniej, 27 lipienia Partyja BNF mieła namier pravieści kala rasijskaha pasolstva pikiet suprać raźmiaščeńnia ŭ Lidzie rasijskaj vajennaj bazy. Adnak Minharvykankam admoviŭ u jaho praviadzieńni, matyvujučy svajo rašeńnie tym, što zajaŭka nie adpaviadaje zakanadaŭstvu ab masavych mierapryjemstvach, a taksama niezrazumieła, jakija miery buduć prymać zajaŭniki dla zabieśpiačeńnia biaśpieki ŭdzielnikaŭ pikieta. Aprača taho, u piśmovym adkazie z harvykankama zaznačajecca, što praviadzieńnie pikieta moža stvaryć pieraškody piešachodnamu i transpartnamu ruchu.
Na dumku Partyi BNF, raźmiaščeńnie na terytoryi krainy rasijskich vajennych baz i abjektaŭ supiarečyć nacyjanalnym intaresam i Kanstytucyi Biełarusi, a taksama stavić pad pahrozu biaśpieku kožnaha biełarusa.
