Kaciaryna Hubarava — žonka tak zvanaha «narodnaha hubiernatara Danbasa» Paŭła Hubarava, jakoha «abrali» na hetu «pasadu» jaho ž prychilniki z Narodnaha apałčeńnia Danbasa na mitynhu i jaki paśla byŭ zatrymany orhanami pravaparadku pa abvinavačvańni ŭ sieparatyźmie i arhanizacyi masavych biesparadkaŭ, vystupiła sa zvarotam, u jakim adchryściłasia ad apošnich dziejańniaŭ prarasijskich mitynhoŭcaŭ.
Nahadajem, Pavieł Hubaraŭ byŭ niepasrednym arhanizataram i ŭdzielnikam dvuch šturmaŭ Danieckaj abłdziaržadministracyi. Paśla jaho aryštu prychilniki praciahvali pravodzić akcyi, patrabujučy vyzvaleńnia svajho lidara. U niadzielu, 16 sakavika, u Daniecku byli zachoplenyja abłprakuratura, upraŭleńnie Słužby biaśpieki i budynak karparacyi Industryjalny sajuz Danbasa.
Padčas sutyknieńniaŭ pamiž prarasijskimi i praŭkrainskimi mitynhoŭcami 13 sakavika byŭ zabity aktyvist «Svabody» Dźmitryj Čarniaŭski.
«Karystajučysia adsutnaściu Paŭła, — skazała Kaciaryna Hubarava, — mnohija radykalnyja elemienty, mnohija pravakatary, prykryvajučysia jaho imiem, sprabujuć uziać narodny pratest na siabie i advieści jaho ŭ bok pahromaŭ i razbureńniaŭ. Ja chaču vas zapeŭnić: Pavieł nikoli nie staviŭ pierad nami takich zadač. My nie nacysty, my nie rujnujem svoj horad, my nie zabivajem ludziej. Na siońnia zapłanavany šerah mierapryjemstvaŭ u Daniecku. Ja źviazałasia ź ich arhanizataram — z Robiertam Doniam. I chaču skazać, što jon vyjšaŭ z našych šerahaŭ, z Narodnaha apałčeńnia Danbasa. Zaraz u jaho svaja arhanizacyja. i ŭsiu adkaznaść za praviadzieńnie hetych mierapryjemstvaŭ, za toje, jak jany buduć prachodzić, i jakija vyniki jon ad hetaha atrymaje, jon biare na siabie…».
