U dzień vybaraŭ 23 sakavika ŭ Minsku budzie pracavać słužba «Sacyjalnaje taksi», kab zabiaśpiečyć padvoz na vybarčyja ŭčastki hramadzian, jakija majuć prablemy z samastojnym pierasoŭvańniem. Čakajecca napłyŭ achvotnych, tamu ŭłady rajać im prahałasavać daterminova.
Pra heta paviedamlaje staršynia kamiteta pa pracy, zaniataści i sacyjalnaj abaronie Minharvykankama Žanna Ramanovič:
«Uličvajučy toje, što ŭ horadzie tolki 19 mašyn «Sacyjalnaje taksi», my budziem prapanoŭvać hetaj katehoryi haradžan, pačynajučy z zaŭtrašniaha dnia realizavać svajo kanstytucyjnaje prava i ŭziać udzieł u vybarach u pieryjad daterminovaha hałasavańnia — z 18 pa 22 sakavika».
Siońnia ŭ horadzie žyvie bolš za 42 tys. čałaviek, jakija pa stanie zdaroŭja, z-za roznych zachvorvańniaŭ abo traŭmaŭ majuć ciažkaści z samastojnym pierasoŭvańniem, i tolki 19 mašyn «Sacyjalnaje taksi».
Taksama 23 sakavika buduć pracavać sacyjalnyja rabotniki i vałanciory, jakija dapamohuć haradžanam pryjści na vybarčyja ŭčastki, raźmieščanyja pobač ź ich miescam žycharstva. Dla asobnych katehoryj hramadzian budzie arhanizavana hałasavańnie doma.
«My padrychtavali śpisy hramadzian, kudy ŭvajšli invalidy pieršaj hrupy, invalidy- kalasačniki, baćki, jakija vychoŭvajuć dziaciej- invalidaŭ, i pieradali ich va ŭčastkovyja vybarčyja kamisii, — raspaviadaje spadarynia Ramanovič. — My atrymlivajem niamała telefonnych zvankoŭ ad hetaj katehoryi hramadzian. Minčanie prosiać, kab da ich na dom pryjšli členy ŭčastkovych vybarčych kamisij».