Staršynia Rady BNR Ivonka Surviła zaklikała suajčyńnikaŭ hodna adznačyć Dzień Voli — čarhovuju hadavinu abviaščeńnia niezaležnaści Biełaruskaj Narodnaj Respubliki (25 sakavika 1918 hoda).
«Hetym vy prypomnicie śvietu, što i vy chočacie być haspadarami na svajoj ziamli», — havorycca ŭ jaje zvarocie, raźmieščanym na staroncy Rady BNR u «Fejsbuku».
Surviła źviartajecca da suajčyńnikaŭ «z tryvohaj na dušy». «Padziei va Ukrainie pakazali śvietu, da jakoj skrajnaści Maskva hatovaja pajści, kab viarnuć impieryju. Nie zvažajučy na zakony mižnarodnaha sužyćcia, na mižnarodnyja — joju padpisanyja — dahavory i na adnahałosnaje asudžeńnie ŭsiaho śvietu, Rasija napała na susiedniuju dziaržavu pad vydumanym pretekstam niebiaśpieki, jakaja maŭlaŭ pahražaje «ruskamoŭnamu» nasielnictvu hetaje dziaržavy. U tryccatyja hady napad na susiedniuju dziaržavu pad padobnym pretekstam byŭ pieršym krokam da najstrašniejšaj suśvietnaj vajny, jakuju pieražyło čałaviectva», — skazała jana.
Dla Biełarusi, padkreślivaje Surviła, «maskoŭskaja ahresija na Ukrainu asabliva tryvožnaja». «Kali śviet adekvatna nie zareahuje, my možam stacca nastupnaj achviaraj maskoŭskaha impieryjalizmu. Pretekst budzie toj samy: rasijskamoŭnaje nasielnictva Biełarusi», — miarkuje jana.
Ad imia Rady BNR Surviła vykazvaje «salidarnaść z ukrainskim narodam i jaho hierojami, jakija siońnia zmahajucca suprać pucinskaj impieryi zła». «Nie davajcie režymu ŭciahnuć vas u hetuju impieryju. My na baku cyvilizavanaha śvietu, a nie dzikich ahresaraŭ», — zajaviła jana.
