Pravaabaronca Aleś Bialacki staŭ łaŭreatam premii šviedskaj pravaabarončaj arhanizacyi Civil Rights Defenders za 2014 hod.
«Bolš za 30 hadoŭ jon žyvie ŭ bieśpierapynnaj baraćbie za demakratyju i pravy čałavieka — spačatku ŭ SSSR, a zatym u Biełarusi», — adznačajecca ŭ pres-paviedamleńni arhanizacyi.
«Aleś źjaŭlajecca adnym z adzinaccaci biełaruskich palitviaźniaŭ. Jon asudžany da 4,5 hadoŭ pazbaŭleńnia voli za ŭchileńnie ad vypłaty padatkaŭ u sudzie z vyraznymi palityčnym padtekstam. Jon byŭ aryštavany 4 žniŭnia 2011 h. i z tych časoŭ znachodzicca ŭ turmie. Kiraŭnik viadučaj pravaabarončaj arhanizacyi krainy, Aleś Bialacki źjaŭlajecca centralnaj fihuraj u biełaruskaj hramadzianskaj supolnaści», — adznačajuć u Civil Rights Defenders.
«Sudovy praces pa spravie Bialackaha byŭ inicyjavany niahledziačy na mižnarodnyja pratesty i patrabavańni ab jaho vyzvaleńni. Praces pieraśledu Alesia byŭ naŭprost źviazany ź jaho pravaabarončaj dziejnaściu i prysud słužyć papiaredžańniem dla ŭsioj biełaruskaha hramadzianskaj supolnaści», kaža Robiert Chord, dyrektar Civil Rights Defenders.
Bialacki raniej atrymaŭ šerah mižnarodnych premij. Jon byŭ naminavany na Nobieleŭskuju premiju miru.
Uručeńnie premii projdzie 4 krasavika ŭ Stakholmie.Bialacki znachodzicca ŭ turmie, tamu premiju za jaho atrymajuć jaho žonka Natalla Pinčuk i kaleha-pravaabaronca Taćciana Raviaka.
Premija Civil Rights Defenders była zasnavanaja ŭ 2013 hodzie. Jaje hrašovaje vymiareńnie — 50 tysiač jeŭra.
