Kiraŭnictva avijakampanii «Biełavija» pryniało rašeńnie ab admienie rejsaŭ ŭ Simfieropal (Krym) na leta 2014 hoda. Ab hetym paviedamiŭ namieśnik hienieralnaha dyrektara pa markietynhu i źniešnieekanamičnaj dziejnaści «Biełavija» Ihar Čarhiniec.
«U hetym hodzie rejsaŭ ŭ Simfieropal nie budzie. My nie budziem lotać z kamiercyjnych pryčyn — nievialikaja zahruzka. Kvitki mała kuplajuć», — rastłumačyŭ namieśnik kiraŭnika pradpryjemstva.
U papiarednija hady samaloty «Biełavija» lotali ŭ Simfieropal letam — z červienia pa žnivień. Avijapieravozčyk daŭno pačaŭ ažyćciaŭlać paloty ŭ hety horad. Niekalki hadoŭ tamu biełaruskaja avijakampanija ŭžo spyniała spałučeńnie ź Simfieropalem, što taksama było źviazana ź nievysokimi finansavymi prybytkami, raspavioŭ Ihar Čarhiniec.
U kancy studzienia 2014 hoda «Biełavija» pačała pracu ŭ jurydyčnym statusie adkrytaha akcyjaniernaha tavarystva. Jana źjaŭlajecca najbujniejšym avijapieravozčykam Biełarusi, u tym liku viadučym hruzavym. Bazirujecca ŭ Nacyjanalnym aeraporcie Minsk i ažyćciaŭlaje rehularnyja rejsy ŭ 43 aeraporta krain Jeŭropy i Azii. Adpaviadaje vyšejšym mižnarodnym standartam zabieśpiačeńnia biaśpieki. Fłot avijakampanii naličvaje 22 pavietranych suda. U studzieni-sakaviku biahučaha hoda «Biełavija» pieraviezła kala 270,4 tys. pasažyraŭ, što na 15,1% bolš, čym za anałahičny pieryjad minułaha hoda.
