Pierad pačatkam čempijanatu nie źbiraŭsia iści na chakiej. Sprava ŭ tym, što ja byvaŭ na chakiei šmat razoŭ. Na katku ŭ parku Horkaha, na Prytyckaha, u Pałacy sportu. Nivodnaha razu mnie chakiej nie spadabaŭsia. Kiepskaje aśviatleńnie, nie bačna šajby, ubohija dekaracyi, pašarpanaje škło, choład. Ja dumaŭ, što chakiej jon zaŭsiody taki. Elitarny sport, jaki zdolnyja acanić tolki iścinnyja vyčvarency (zakreślena) hurmany. Tamu pierastaŭ chadzić na areny, ale štoviasnu hladzieŭ pa telebačańni čempijanaty śvietu.
Siabra ŭsio ž uhavaryŭ schadzić na hulniu. Abrali sustreču Šviecyja — Narviehija na «Čyžoŭka-Arenie». Toje, što ja pabačyŭ, pryjemna ździviła. Zručna, kamfortna, ciopła i hałoŭnaje — usio bačna jak na dałoni! «Arena» sapraŭdy stvoranaja dla ludziej. I naviedvalniki realna kajfujuć. Ščaślivyja narviežcy śpiavali ŭ chole, biełarusy nie prapuskali mahčymaści sfotkacca z skandynaŭskim «Abieliskam», kałarytnym vusačom. Dla ludziej — heta śviata. Dla našych, dla turystaŭ.
Nie raskazvajcie mnie ab previentyŭnych zatrymańniach aktyvistaŭ i palitviaźniaŭ. Cudoŭna viedaju pra ich isnavańnie. Ja šmat razoŭ padymaŭ hetyja temy, u tym liku pierad Łukašenkam, kali zdarycca mahčymaść, to budu padymać znoŭ. Ja liču haniebnym, što siońnia ŭ siaredniajeŭrapiejskaj krainie sadžajuć za kraty za palityčnyja pohlady. I maja pazicyja niaźmiennaja. Ad naviedvańnia chakieja ja nie pačnu ličyć Statkieviča i Bialackaha «bandytami», a vybary 2001, 2006, 2010 — sumlennymi i spraviadlivymi.
Mahčyma, ja byŭ u vialikaj ejfaryi, ale padałosia, što ČS — heta ŭsio ž śviata prostych ludziej, a nie dyktatury.
Kali viartaŭsia z «Čyžoŭki» dadomu, to dvoje paddatych pacanoŭ razvažali. «My ŭziali čatyry čatyry ściažki — dva narviežskija i dva šviedskija. A adzin narviežski parvaŭsia. I ja skazaŭ, što lik budzie 2:1 na karyść Šviecyi. I tak stałasia. Prabačcie mnie, kali łaska. Zrešty, usio heta ch…nia. Hałoŭnaje — kab Biełaruś pieramahała».
Ja daloki ad dumki, što sport moža stać nacyjanalnaj idejaj. Ale spartovyja pieramohi dobra raźvivajuć u ludziach patryjatyzm. Usim padabajecca, kali tvaje suajčyńniki «dziaruć» niemcaŭ, ruskich i finaŭ. Chaj heta i patryjatyzm «nižejšaha hatunku», samaje jaho pieršasnaje prajaŭleńnie. Ale hałoŭnaje słova tut «patryjatyzm», a ŭsio astatniaje — dadatki.
Dobra pomniu, jak u 2000-m hodzie (mnie 14 hadoŭ) u mianie doma sabrałasia čałaviek dziesiać siabroŭ. I my ŭhołas adličvali apošnija 100 siekundaŭ hulni Biełaruś - Rasija na čempijanacie śvietu pa chakiei ŭ Piciery. Našy pieramahali 1:0, kłalisia mužna pad šajby, adbivalisia ad atak zorak Jašyna i Bure. I pieramahli.
Heta było nastolki kruta, što ciažka navat rastłumačyć słovami. Taja pieramoha zasieła ŭ mianie ŭ pamiaci navat lepš za słavutuju hulniu z šviedami na Alimpijadzie. Honar za krainu pierapaŭniaŭ nas u toj dzień. I mnie zdajecca ŭžo tady nieśviadoma pačało źjaŭlacca razumieńnie, što hublać svaju krainu i dziaržaŭnaść nielha, navat dziela takich drobnych momantaŭ, jak chakiejnyja pieramohi.
