Adnačasovaje vykarystańnie smartfonaŭ, noŭtbukaŭ, płanšetaŭ i inšych hadžetaŭ mianiaje strukturu mozhu, vyśvietlili navukoŭcy Univiersiteta Saseksa.
U tych, chto złoŭžyvaje šmatzadačnaściu, źnižajecca ščylnaść šeraha rečyva ŭ piaredniaj pasavaj kary (PPK) — vobłaści, jakaja adkazvaje za kahnityŭnyja (paznavalnyja) funkcyi i kantrol nad emocyjami. Novaje daśledavańnie pradstaŭlena ŭ časopisie PLoS ONE, a koratka pra jaho paviedamlajecca ŭ pres-relizie univiersiteta.
Abśledavańnie z dapamohaj mahnitnaj tamahrafii 75 darosłych ludziej pakazała, što tyja ź ich, chto maje zvyčku adnačasova karystacca niekalkimi «miedyjnymi» pryładami (u ich lik uvajšli nie tolki kampjutary i smartfony, ale i televizary, a taksama papiarovyja ŚMI), vałodajuć mienš ščylnym šerym rečyvam u PPK. Statystyku pa zvyčkach respandentaŭ atrymali ŭ chodzie papiaredniaha ankietnaha apytańnia.
Novaje daśledavańnie ŭzhadniajecca ź inšymi dadzienymi niejrafizijałohii. Miedyjnuju šmatzadačnaść raniej užo ŭviazvali sa słabaj uvahaj i emacyjnymi prablemami — takimi, jak depresija, a taksama padvyšanaja tryvožnaść.
«Kankretnyja miechanizmy hetaj suviazi zastajucca niezrazumiełymi. Albo ludzi z pamienšanaj piaredniaj pasavaj karoj, słaba kantralujučyja svaje emocyi i paznavalnyja pracesy, vymušanyja rabić niekalki spraŭ adnačasova, albo ž praciahły vopyt šmatzadačnaści pryvodzić da strukturnych źmienaŭ mozhu. Kab zrazumieć kirunak dadzienaj pryčynna-śledčaj suviazi, spatrebicca doŭhaterminovaje daśledavańnie», — zajaviŭ adzin z aŭtaraŭ pracy niejrafizijałohii Kiepki Ło.
Zrešty, struktura mozhu źmianiajecca pad upłyvam samaha roznaha vopytu, nie abaviazkova niehatyŭnaha. U inšych daśledavańniach było vyjaŭlena, što ščylnaść šeraha rečyva transfarmavałasia, naprykład, u taksistaŭ, jakija vyvučyli kartu Łondana, i ŭ štukaroŭ-pačatkoŭcaŭ.
