fota abmiennaha punktu ŭ HC «Ščaście» z sajta Śledčaha kamiteta
fota Tut.by
fota Hanny Badziaka
fota Hanny Hadziaka
fota z FB Cimafieja Drančuka
Kiraŭnictva minskaj milicyi, fota z FB Cimafieja Drančuka
tut.by
fota Jeŭraradyjo
fota Jeŭraradyjo
19.56
Jak paviedamlaje BiełaPAN, siłavuju apieracyju pa niejtralizacyi złačynca praviali bajcy śpiecpadraździaleńnia MUS pa baraćbie z teraryzmam «Ałmaz».
18:35
Jak udałosia daviedacca kp.by, zachopnika pryvieźli ŭ 5-ju haradskuju balnicu z ahniastrelnym ranieńniem u hałavu. U pryjomnym pakoi 5-j kliničnaj balnicy paviedamili, što ciapier zachopnika abmieńnika apierujuć, a paśla apieracyi jaho pieraviaduć u reanimacyju. Pa śpisach u balnicy jon prachodzić jak nieviadomy.
«Ni imia, ni proźvišča, ni hod naradžeńnia nie paznačanyja», — paviedamili ŭ balnicy.
17.07
Na miescy zdareńnia praciahvajuć pracavać śpiecyjalisty z MUS, SK i Kamiteta sudovych ekśpiertyz. Padrabiaznaści ab chodzie apieracyi aficyjnyja asoby abiacali paviedamić paźniej.
16.50
Śpiecapieracyja skončyłasia, zakładnica žyvaja i na voli.
«Pieramovy z napadnikam nie prynieśli plonu. U vyniku zładžanaj siłavoj apieracyi zakładnicu ŭdałosia vyzvalić, a napadnika — niejtralizavać», — zajaviŭ žurnalistam pres-sakratar minskaj milicyi Alaksandr Łastoŭski.
Bolš nijakich aficyjnych kamientaroŭ nie było, paviedamlaje karespandent NN. Pa jaho źviestkach, napadnika vynieśli z budynka i pahruzili ŭ mašynu «chutkaj» ź sistemaj reanimacyi.
16.39
Dziejańnie pieramiaściłasia da zadniaha ŭvachodu «Ščaścia», paprasili kalidor dla «chutkaj», paviedamlaje karespandent NN ź miesca padziej.
16.23
U budynak ŭvajšli supracoŭniki Kamiteta sudovych ekśpiertyz. U rukach u ich — pracoŭnyja čamadančyki z abstalavańniem.
15:59
Pa słovach rabotnikaŭ handlovaha centra, zachopnik patrabavaŭ nie tolki śviatara, ale i śviatuju vadu i lusterka.
15:54
Pa fakcie zachopu zakładnikaŭ raspačata kryminalnaja sprava pa art. 291 Kryminalnaha kodeksa, — tolki što paviedamiła aficyjny pradstaŭnik SK Julija Hančarova. — Z napadnikam ciapier viaducca pieramovy.
15:43
Z advarotnaha boku budynka handlovaha centra «Ščaście» i prylehłaha «Doma bytu» karespandent «Kamsamołki» zaŭvažyŭ niekalkich ludziej u broniekamizelkach, kaskach i z aŭtamatami.
15:35
Pradstaŭnik Śledčaha kamiteta paviedamiŭ prysutnym žurnalistam, što pakul situacyja całkam nie vyrašycca, inšych aficyjnych kamientaroŭ nie budzie.
Pa słovach karespandenta kp.by, katalicki śviatar zaviaršyŭ pieramovy i syšoŭ.
Rabotnica handlovaha centra ŭ hutarcy z karespandentam Jeŭraradyjo paviedamiła, što kasirka — maładaja dziaŭčyna. Proźvišča kasirki jana nie viedaje, bo dziaŭčaty ŭ abmieńniku časta mianiajucca. Taksama jana skazała, što napad adbyŭsia kala 13-j hadziny.
Sa słovaŭ miascovaj žycharki Volhi tut.by paviedamlaje, što napadnik — dobra apranuty mužčyna hadoŭ 30.
***
Dniom 1 kastryčnika ździejśnieny napad na punkt abmienu valut u handlovym centry «Ščaście» na praśpiekcie Niezaležnaści (stancyja mietro «Uschod»), paviedamiŭ BiełaPAN aficyjny pradstaŭnik upraŭleńnia Śledčaha kamiteta pa Minsku Alaksandr Hierasimaŭ.
«U punkt abmienu valut «BiełŚvisBank» prabraŭsia nieviadomy z pradmietam, padobnym na pistalet». Na miescy pracuje śledča-apieratyŭnaja hrupa, pradstaŭniki Śledčaha kamiteta, MUS, śpiecsłužby», — skazaŭ Hierasimaŭ.
«Na abmienny punkt BelSwiss banka napaŭ mužčyna, vierahodna z ahniastrelnaj. Kryki na ŭvieś HC, AMAP užo tut, — paviedamiŭ u Twitter śviedka. — Dziaŭčynu ŭ zakładniki ŭziaŭ. Siadziać unutry pakoja, pakul biez ruchu, piša kp.by sa spasyłkaj na vidavočcu.
Raniej u pres-słužbie staličnaj milicyi infarmacyju ab zachopie paćvierdzić nie zmahli, ale adznačyli, što ŭ handlovym centry znachodzicca milicyja i kiraŭnictva Minharvykankama. «Nie mahu ničoha nie skazać ab napadzie abo zachopie. Na miescy pracuje milicyja, u handlovym centry znachodzicca kiraŭnictva staličnaj milicyi», - raspavioŭ TUT.BY pres-sakratar HUUS Minharvykankama Alaksandr Łastoŭski.
Pavodle kp.by sa spasyłkaj na vidavočcaŭ, napadnik dačakaŭsia, pakul kasir budzie vychodzić, zašturchaŭ dziaŭčynu ŭnutr, zajšoŭ za joj i zakryŭsia na zamok znutry.
Karespandent «Jeŭraradyjo» Arciom Martynovič paviedamlaje, što kala handlovaha centra staić «chutkaja». Terytoryja vakoł ačeplenaja stužkaj. Pavodle nieaficyjnaj infarmacyi, na miesca prybyło kiraŭnictva haradskoj milicyi. Da siłavikoŭ nabliziŭsia śviatar.
