1 kastryčnika sud Centralnaha rajona Homiela ŭ asobie sudździ Volhi Kazłovaj vynies rašeńnie pra admovu ŭ zadavalnieńni skarhi sustaršyni zarehistravanaj u Čechii arhanizacyi «Małady front» Andreja Cianiuty. Adkazčykam pa spravie źjaŭlaŭsia Homielski dziaržaŭny ŭniviersitet imia Francyska Skaryny.
Z VNU aktyvist byŭ adličany 20 maja 2014 hoda. Były student paličyŭ adličeńnie niezakonnym i palityčna matyvavanym i padaŭ skarhu ŭ sud.
Pradstaŭnik HDU imia F.Skaryny, načalnik jurydyčnaha adździeła ŭniviersiteta Valeryj Niedastup, nie pahadziŭsia ź iskam i prasiŭ sud admović u zadavalnieńni skarhi, bo, pavodle jaho mierkavańnia, byli prapuščanyja terminy abskardžańnia, a adličeńnie było zakonnym.
Advakat zajaŭnika Piotr Barysaŭ pryvodziŭ u sudzie dovady, što adličeńnie nie było zakonnym, bo parušana jaho pracedura i pašyrana vytłumačanyja praviły ŭnutranaha rasparadku, na parušeńni jakich spasyłałasia pry adličeńni VNU.
«Pavodle Kodeksa ab adukacyi, treba pry adličeńni vykanać nieabchodny paradak z šaści punktaŭ, u hetym vypadku ŭniviersitet vykanaŭ tolki dva punkty. Taksama ŭ studenta nie brali tłumačeńni, i nam zdajecca, pašyryli vykarystańnie pravił unutranaha rasparadku, jakija datyčacca pavodzin u ścienach univiersiteta i padčas navučalnaha pracesu. Administracyjnyja pravaparušeńni, na jakija spasyłaŭsia pry adličeńni VNU, byli ŭčynienyja nie ŭ ścienach univiersiteta ci internata i nie padčas navučalnaha pracesu ci siesii», — prakamientavaŭ advakat.
Andrej Cianiuta rašeńnie suda nazvaŭ čakanym. «Tamu što kali sprava datyčycca palityki — sud zaŭsiody stanovicca na bok dziaržavy, a nie aktyvistaŭ. Ja budu abskardžvać hetaje rašeńnie choć by dla taho, kab papsavać niervy administracyi ŭniviersiteta, kab jany viedali — u vypadku adličeńnia studentaŭ za palityku ich čakajuć sudovyja razbory», — adznačyŭ sustaršynia «Maładoha frontu». Jon dadaŭ, što adličeńni z HDU imia F.Skaryny aktyvistaŭ — «heta ŭžo sistema», nahadaŭšy pra adličeńnie z univiersiteta vydatnika Dźmitryja Žaleźničenki, jaki zatym paśpiachova skončyŭ zamiežnaje VNU.
Pavodle dakumienta, padpisanaha 20 maja rektaram Alaksandram Rahačovym, student 3-ha kursa zavočnaha fakulteta śpiecyjalnaści «Pravaznaŭstva» adličany «za ŭčynienyja sistematyčnyja supraćpraŭnyja dziejańni ŭ adpaviednaści z Kodeksam ab adukacyi i praviłami ŭnutranaha rasparadku». Padstavami dla adličeńnia nazvanyja rašeńni suda Centralnaha rajona Homiela ad 17 krasavika i suda Čyhunačnaha rajona Homiela ad 6 maja. Nahadajem, 17 krasavika sud pryznaŭ Cianiutu vinavatym u «parušeńni paradku praviadzieńnia masavaha mierapryjemstva», kali toj z tavaryšami ŭskładaŭ kvietki ŭ Homieli ŭ pamiać ab zahinułych u Kijevie. Cianiuta atrymaŭ u sudzie aficyjnaje papiaredžańnie ab niedapuščalnaści parušeńnia zakanadaŭstva.
6 maja jon byŭ aryštavany na 10 sutak za nibyta niecenzurnuju łajanku i niepadparadkavańnie patrabavańniam supracoŭnikam milicyi. Cianiuta zajaviŭ, što heta było previentyŭnaje zatrymańnie napiaredadni čempijanatu śvietu pa chakiei ŭ Minsku.
