Biełaruś nie hatovaja pryznać Danieckuju narodnuju respubliku i Łuhansk narodnuju respubliku, zajaviŭ Alaksandr Łukašenka ŭ intervju telekanału «Jeŭrańjus».
U jakaści intervjujera 1 kastryčnika ŭ Minsku vystupiŭ kiraŭnik biuro «Jeŭrańjus» va Uschodniaj Jeŭropie ź siadzibaj u Kijevie Serdžya Kantonie. Intervju pakazana ŭviečary 3 kastryčnika.
Adkazvajučy na jaho pytańnie pra hatoŭnaść pryznać Danieckuju narodnuju respubliku i Łuhansk narodnuju respubliku, Łukašenka adkazaŭ admoŭna.
«Nie, nie, ale my ž zusim inšaj pazicyi prytrymlivajemsia. My nie chacieli b razbureńnia Ukrainskaj dziaržavy. Tut mnohija kažuć, što kaliści tam Krym «niapravilna» adyšoŭ da Ukrainy, što heta terytoryja spradviečna rasijskaja, i hetak dalej… Heta niapravilny padychod»,
— zajaviŭ kiraŭnik biełaruskaj dziaržavy.
Łukašenka taksama adkazaŭ na pytańnie, ci ŭpeŭnieny jon u tym, što vystupaje jak sumlenny pasiarednik u hetym kanflikcie, pakolki ŭ žurnalista «Jeŭrańjus» skłałasia ŭražańnie, što biełaruski kiraŭnik uskładaje vinu tolki na ŭkrainski bok, ale nie na prarasiejskich paŭstancaŭ.
«Ukraina stała teatram vajennych dziejańniaŭ i teatram razborak bujnych hieapalityčnych sił. Ja pra heta skazaŭ — heta nie tolki Zachad, ale i Uschod, na žal», — skazaŭ Łukašenka.
«Što tyčycca Rasii, to ja liču, što pamyłak narabili šmat tut i Zachad, i Rasija. Ale pieršapačatkova vialikuju adkaznaść na sabie niasie Zachad, a nie Rasija.
Nie Rasija na tym ža Majdanie ździajśniała eskałacyju kanfliktu, nie Rasija tam dziejničała, a niekatoryja słužbovyja asoby zachodnich dziaržaŭ, pra heta viedaje ŭvieś śviet, i my taksama, tamu što my byli pobač. Hetyja asoby dziejničali adkryta, padšturchoŭvajučy ŭdzielnikaŭ Majdana da sutyknieńniaŭ», - dadaŭ kiraŭnik biełaruskaj dziaržavy.
«Ja pieršapačatkova zajaŭlaŭ pra toje, što prajekt, da prykładu, Navarosii mnoj nie ŭsprymajecca. Ja vystupaju za adzinstva i cełasnaść Ukrainskaj dziaržavy. Kab nie było tam zamarožanych niejkich kanfliktaŭ, niejkich zon typu Prydniastroŭja, Nahornaha Karabacha, jakija zaŭsiody utojvajuć niebiaśpieku vybuchu. Ja asabista hetaha nie chaču jak čałaviek i jak prezident Biełarusi, tamu što my znachodzimsia zusim pobač z Ukrainaj», — padkreśliŭ Łukašenka.
U cełym, pavodle jaho słoŭ, kali kazać šyrej ab stabilizacyi situacyi va Ukrainie,
«to tam na absalutna demakratyčnych pryncypach treba pravieści reformu kanstytucyi i ŭsiaho palityčnaha pracesu».
«Pakul ža jość aliharchija va Ukrainie, jakaja, darečy, užo maje svaje ŭzbrojenyja siły. U aliharchaŭ intaresy daloka za miežami Ukrainy, u ich hrošy nie va Ukrainie, jany ŭ luby momant mohuć zmatacca z Ukrainy, u ich niama ničoha ahulnaha z ukrainskim narodam», — pierakanany Łukašenka.
