Nacyjanalny bank Biełarusi ŭpieršyniu praviadzie dzień adčynienych dźviarej.
Mierapryjemstva projdzie 18 kastryčnika adnačasova ŭ centralnym aparacie Nacyjanalnaha banka ŭ Minsku i va ŭsich hałoŭnych upraŭleńniach Nacbanka pa abłaściach.
Dzień adčynienych dźviarej u Nacyjanalnym banku pravodzicca ŭ miežach abvieščanaha ŭ Biełarusi Hoda haścinnaści i ahulnadziaržaŭnaj kampanii pa pavyšeńni finansavaj adukavanaści nasielnictva, jakaja realizujecca ŭ krainie.
Dla praviadzieńnia dnia adčynienych dźviarej u centralnym aparacie Nacbanka vybrany farmat siamiejnaha śviata, jaki padrazumiavaje arhanizacyju šerahu mierapryjemstvaŭ, raźličanych na šyrokuju metavuju aŭdytoryju: praviadzieńnie tematyčnych konkursaŭ, hulniaŭ i viktaryn z uručeńniem pryzoŭ i suvieniraŭ, raspaŭsiudžańnie navučalnych i prezientacyjnych materyjałaŭ, davańnie kansultacyj pa roznych pytańniach vykarystańnia bankaŭskich i finansavych instrumientaŭ i inšaje.
U Nacbanku abiacajuć, što ŭ hety dzień luby achvotny zmoža daviedacca: jak «naradžajucca», «žyvuć» i «pamirajuć hrošy; jak adroźnić padroblenyja hrošy ad sapraŭdnych; što mohuć bankaŭskija płaciežnyja kartki; jak pracuje «bank na kanapie». Možna budzie ŭbačyć kabiniet staršyni praŭleńnia Nacbanka i zału pasiadžeńniaŭ, daviedacca, što znachodzicca ŭ kabinie inkasatarskaha aŭtamabila.
Uvachod u budynak centralnaha aparatu Nacyjanalnaha banka ŭ Minsku pa praśpiekcie Niezaležnaści, 20, budzie adčynieny dla ŭsich achvotnych 18 kastryčnika z 10.00 da 15.00.
