Pasiadžeńnie Savieta ministraŭ Sajuznaj dziaržavy (SD) Biełarusi i Rasii adbudziecca siońnia ŭ Nacyjanalnaj biblijatecy. Na paradku dnia 35 pytańniaŭ.
fota z facebook Dźmitryja Miadźviedzieva
Pierad pačatkam pasiadžeńnia zapłanavana sustreča Alaksandra Łukašenki sa staršynioj urada RF Dźmitryjem Miadźviedzievym. Zatym Miadźviedzieŭ i jaho biełaruski kaleha Michaił Miaśnikovič praviaduć pieramovy ŭ farmacie «sam-nasam», paśla čaho praca sajuznaha ŭrada praciahniecca ŭ pašyranym składzie.
Paśla zaviaršeńnia pasiadžeńnia premjer-ministry naviedajuć novy muziej historyi Vialikaj Ajčynnaj vajny, paviedamili ŭ Nacyjanalnym pres-centry.
Siarod najvažniejšych pytańniaŭ, jakija vynosiacca na abmierkavańnie sajuznaha ŭrada, — vyniki handlova-ekanamičnaha supracoŭnictva ŭ 2013 hodzie i pieršym paŭhodździ 2014 hoda; asnoŭnyja paramietry prajekta sajuznaha biudžetu na 2015 hod; pryjarytetnyja kirunki dalejšaha raźvićcia SD na siarednieterminovuju pierśpiektyvu (2014—2017 hady); prahnoznyja bałansy popytu i prapanovy pa najvažniejšych vidach pradukcyi SD na 2014 hod; indykatyŭnyja bałansy paliŭna-enierhietyčnych resursaŭ SD na 2014 i 2015 hady; adzinaja strukturnaja pramysłovaja palityka ŭ miežach SD; prahrama ŭzhodnienych dziejańniaŭ u halinie źniešniaj palityki na 2014—2015 hady; płan mierapryjemstvaŭ pa farmiravańni i funkcyjanavańni abjadnanaj transpartnaj sistemy SD; kancepcyja sacyjalnaha raźvićcia SD da 2015 hoda; płany sumiesnych mierapryjemstvaŭ pa zabieśpiačeńni funkcyjanavańnia rehijanalnaj hrupoŭki vojsk (sił) Biełarusi i RF, a taksama pa procidziejańni teraryzmu na terytoryi SD u 2015 hodzie i inš.
