Svajaki i siabry nie zmahli sustreć aktyvista maładziožnaha kryła «Zmiena» kampanii «Havary praŭdu» Paŭła Vinahradava, jaki siońnia ranicaj pavinien byŭ vyzvalicca ź minskaha Centra izalacyi pravaparušalnikaŭ (CIP) paśla 15-sutačnaha administracyjnaha aryštu.
Vinahradava pavinny byli adpuścić kala 10.00, adnak da asob, jakija pryjšli sustrakać Vinahradava, vyjšaŭ načalnik CIP Ihar Sakałoŭski i skazaŭ, što aktyvista vyvieźli z centra ŭ 8 hadzin ranicy, kudy mienavita — nie paviedamiŭ. Paźniej vyśvietliłasia, što Vinahradava advieźli ŭ Maskoŭskaje RUUS. Ciapier pravaabaroncy i rodnyja sprabujuć vyśvietlić akaličnaści.
9 kastryčnika Pavieł Vinahradaŭ byŭ pryhavorany da 15 sutak administracyjnaha aryštu i aštrafavany na 1 młn. 200 tys. rubloŭ pa abvinavačańni ŭ drobnym chulihanstvie. U hety ž dzień sud pryniaŭ rašeńnie pradoŭžyć na hod previentyŭny nahlad, jaki zakančvaŭsia 25 kastryčnika.
Biełaruskija apazicyjnyja i pravaabarončyja arhanizacyi, a taksama mižnarodnyja pravaabaroncy vystupili z patrabavańniami spynić pieraśled hramadskaha aktyvista.
***
26-hadovy Vinahradaŭ byŭ adnym ź fihurantaŭ kryminalnaj spravy ab masavych biesparadkach u Minsku 19 śniežnia 2010 hoda, jaho asudzili na čatyry hady kałonii ŭzmocnienaha režymu i vyzvalili na padstavie ŭkaza prezidenta ab pamiłavańni, choć z prašeńniem ab pamiłavańni aktyvist nie źviartaŭsia. Vinahradaŭ vyjšaŭ na volu ŭ vieraśni 2011 hoda. Z taho času pravaabaroncy zafiksavali 16 vypadkaŭ jaho zatrymańnia, 15 ź jakich zaviaršylisia administracyjnymi aryštami na termin ad 5 da 25 sutak, što sumarna składaje 165 sutak — faktyčna piać z pałovaj miesiacaŭ. U 2014 hodzie Vinahradaŭ adsiedzieŭ 65 sutak źniavoleńnia, uklučajučy ciapierašni aryšt.
