Siońnia ŭ Minskim haradskim sudzie adbyŭsia razhlad kasacyjnaj skarhi homielskaha aktyvista Juryja Rubcova na prysud suda Savieckaha rajona Minska ad 6 kastryčnika.
Staršynioj sudovaj kamisii była sudździa Minskaha haradskoha suda Ludmiła Šapašnikava. Jak i na papiarednich pracesach, u sudovuju zału zapuskali tolki paśla vielmi starannaha vobšuku i tolki praz ramku mietałašukalnika.
Pierad uvachodam dziažuryli niekalki čałaviek u spartovym adzieńni i biez apaznavalnych znakaŭ. Paśla pracesu jany pilna nazirali za žurnalistami, jaikia brali intervju ŭ Rubcova.
Na sudzie prysutničali dva čałavieki, jakija pradstavilisia naziralnikami ad pasolstva ZŠA ŭ Biełarusi, adnak jany syšli, nie dačakaŭšysia zakančeńnia pracesu.
Rubcoŭ zajaviŭ sudździ, što nie zhodny z rašeńniem suda Savieckaha rajona, vykazaŭ niedavier sudovaj sistemie i zajaviŭ advod sudovaj kamisii, jaki nie byŭ zadavoleny.
«Sudovaja sistema Biełarusi nie adpaviadaje kanstytucyi, bo całkam zaležyć ad voli vykanaŭčaj ułady.
Sudździ pryznačajucca adnym čałaviekam i całkam zaležać ad jaho. A budaŭnictva arendnaha žylla, jakoje budzie davacca ŭ pieršuju čarhu i sudździam, stanie krokam da absalutnaha zakabaleńnia sudździaŭ», — skazaŭ Rubcoŭ padčas svajho vystupu.
Advakatka Rubcova zajaviła, što sukupnaści sabranych dokazaŭ było niedastatkova dla vyniasieńnia prysudu.
Jana taksama skazała, fakt prysudžeńnia maksimalna mahčymaha terminu jaje padabaronnamu, jaki raniej nie byŭ sudzimy i maje stanoŭčyja charaktarystyki, kaža pra toje, što metaju suda było zusim nie pieravychavańnie Rubcova. Jana paprasiła sud pierahladzieć prysudžany termin źniavoleńnia u vypadku, kali prysud nie budzie skasavany.
Adnak sudovaja kamisija vyrašyła pakinuć prysud raniejšym: paŭtara hoda abmiežavańnia voli z nakiravańniem va ŭstanovu adkrytaha typu (h.zv. «chimii»).
Sam Rubcoŭ upeŭnieny, što jaho prysud taki surovy, bo jon zakranuŭ tabujavanuju temu dla sudździaŭ — padrobku sudovych pratakołaŭ dla vyniasieńnia «pravilnaha» prysudu:
«Na apazicyjnych akcyjach supracoŭniki śpiecsłužbaŭ zapisvajuć i zdymajuć usich i ŭsio. Ale padčas sudovych pasiedžańniaŭ u nas čamuści nie viadziecca aŭdyjazapis, choć dla hetaha jość usie mahčymaści. Takim čynam u pratakole možna zapisać tolki toje, što treba».
Pavodle viersii abvinavačvańnia, Rubcoŭ abraziŭ sudździu Kiryłu Pałulecha, jaki jaho sudziŭ paśla zatrymańnia na akcyi «Čarnobylski šlach — 2014».
