Supracoŭnictva ŭ hazavaj śfiery abmierkavali siońnia ŭ Maskvie pieršy vice-premjer Biełarusi Uładzimir Siamaška i kiraŭnik rasijskaha kancerna «Hazprom» Andrej Miler.
Asablivaja ŭvaha na pieramovach nadavałasia pytańniu pastavak rasijskaha hazu ŭ Biełaruś i jaho tranzitu cieraź biełaruskuju terytoryju ŭ 2015—2017 hadach. Było zaznačana, što novyja kantrakty znachodziacca ŭ vysokaj stupieni hatoŭnaści, paviedamlaje RIA Novosti.
Aprača taho, «Hazprom» naraściŭ apieratyŭny rezierv hazu ŭ biełaruskich padziemnych schoviščach na 8,9% — bolš jak da 1 młrd. kubamietraŭ z 920 młn. hodam raniej. Pavialičanaja i maksimalnaja sutačnaja pradukcyjnaść — z 18 młn. da 31 młn. kubamietraŭ.
Abjom inviestycyj «Hazproma» ŭ madernizacyju i rekanstrukcyju hazatranspartnaj sistemy Biełarusi pavodle vynikaŭ 2014 hoda pavinien vyraści da 4 młrd. rubloŭ suprać 3 młrd. u 2013-m.
Kantrakty na pastaŭku i tranzit hazu na 2012—2014 hady byli padpisanyja «Hazpromam» i «Biełtranshazam» u listapadzie 2011 hoda. Tady ž rasijski manapalist i Dziaržaŭny kamitet pa majomaści Biełarusi padpisali dahavor kupli-prodažu 50% akcyj «Biełtranshazu». Takim čynam, z ulikam užo nabytych raniej 50% akcyj biełaruskaj kampanii, «Hazprom» staŭ poŭnaŭładnym uładalnikam «Biełtranshazu», jaki byŭ pierajmienavany ŭ «Hazprom transhaz Biełaruś».
18 listapada Uładzimir Siamaška zajaviŭ žurnalistam u Minsku, što Biełaruś raźličvaje na źnižeńnie cany rasijskaha hazu ŭ 2015 hodzie. Jon paviedamiŭ, što kantrakt na pastaŭku rasijskaha hazu na 2015—2017 hady biełaruski bok raźličvaje padpisać z «Hazpromam» da 30 listapada. «Dziejny kantrakt, jak viadoma, zakančvajecca ŭ kancy hetaha hoda. Zaraz treba damovicca ab umovach pastavak hazu na 2015—2017 hady, praktyčna ŭsie niuansy my ŭzhadnili», — skazaŭ pieršy vice-premjer.
Abmiežavańniaŭ ŭ abjomie zakupki hazu ŭ dakumiencie nie praduhledžana, dadaŭ Siamaška: «Kolki nam treba budzie hazu — stolki my zmožam atrymać».
«Što da cany na haz, to my miarkujem, što jana budzie ŭ nastupnym hodzie krychu nižejšaja za sioletniuju», — zajaviŭ vice-premjer, udakładniŭšy, što zaraz za tysiaču kubamietraŭ hazu Biełaruś płacić 168 dołaraŭ.
Pavodle jaho słoŭ, čakanaje źnižeńnie cany na haz budzie źviazanaje sa źmienaj rasijskaha rubla da dołara. «Formuła cany na haz dla Biełarusi pryviazanaja da cany na haz dla Jamała-Nienieckaj aŭtanomnaj akruhi. Cana hetaja pieraličvajecca z rubloŭ u dołary. Z-za taho, što kursy valut źmianilisia, my dumajem, što cana na haz dla Biełarusi źnizicca», — skazaŭ Siamaška.
