Pazicyi i mahčymaści Rasii va Ukrainie ŭvieś čas paharšajucca, piša eks-lidar rasijskich bajevikoŭ na ŭkrainskim Danbasie Ihar Hirkin («Strałkoŭ») na forumie forum-antikvariat.ru, dzie jon ź viasny paviedamlaŭ adnadumcam pra svaje dziejańni.
Strałkoŭ u čas, kali jon uznačalvaŭ rasijskich bajevikoŭ na Danbasie.
«Čas pracuje na ukraŭ… Jany šalonymi tempami adnaŭlajuć armiju, zakančvajuć zambavańnie nasielnictva i z radasnaj nadziejaj nazirajuć za dziejnaściu piataj kałony ŭ atačeńni samoha Viarchoŭnaha», — napisaŭ eks-aficer FSB, jaki raniej pryznaŭ, što jon niasie adkaznaść za pačatak vajny na ŭschodzie Ukrainy.
«Viarchoŭnym» jon nazyvaje Uładzimira Pucina — prezidenta RF i hałoŭnakamandujučaha rasijskimi ŭzbrojenymi siłami.
Jon ličyć, što za zimu ŭkraincy zmohuć pierapadrychtavać i pieraŭzbroić armiju, padvysiŭšy jaje kolkaść i jakaść nastolki, što tyja rasijskija rehularnyja častki, jakija tajemna vajujuć suprać Ukrainy, užo nie zmohuć supraćstajać uzbrojenym siłam Ukrainy.
Adnačasova sankcyi i ekanamičny kryzis surjozna asłabiać hatoŭnaść rasijskaha hramadzstva «abaraniać ruski śviet», a taksama źnizicca łajalnaść da Pucina rasijskaha čynavienstva. Na padkantrolnaj rasijskim bajevikam razburanaj i źbiadniełaj terytoryi Danbasa ŭ toj ža čas nasielnictva, piša Hirkin-Strałkoŭ, budzie adčuvać tolki nianaviść da Pucina i Rasii.
Ukrainskija vojski na paŭdniovym uschodzie krainy, leta-vosień 2014 hoda.
Ataka ŭkrainskich vojskaŭ viasnoj budzie rašučaj, i biez adkrytaj bujnamaštabnaj rasijskaj interviencyi chutka razabje siły «DNR» i «ŁNR». Kali Rasija nie pojdzie na adkrytuju vajnu suprać Ukrainy, ličyć Hirkin, Ukraina pačnie zmahańnie za Krym. Taksama ŭ takim varyjancie Pucinu pahražaje «maskoŭski majdan», jaki arhanizujecca nie tolki z demakrataŭ, ale i «šyrokich kołaŭ patryjatyčnych hramadzian».
«Treba rychtavacca da vialikaj vajny… A užo zaraz — treba całkam raźbić ukraŭ, pakul jany nie hatovyja da paŭnamaštabnaha ŭdaru. Viasnoj budzie pozna», — zaklučaje Hirkin, jaki dla mnohich ŭ Rasii staŭ simvałam «zmahańnia za ruski śviet».
Niesumnienna, jon razumieje, što jaho čytajuć nie tolki prychilniki, ale i praciŭniki, u tym liku analityki. I hetyja słovy možna razhladać nie tolki ŭ prostym sensie, ale i jak prychavanuju pahrozu Kramla Ukrainie i Zachadu. Zusim vierahodna, što praz Hirkina Maskva kaža, što moža pačać adkrytuju i vialikuju vajnu ŭ centry Jeŭropy, kali jaje ŭmovy nie buduć pryniatyja.
