Lada Granta ŭ samaj prostaj kamplektacyi kaštuje ŭ Rasii 4260 dalaraŭ. Za hetyja hrošy pakupnik atrymaje piacimiescavy siedan ź bienzinavym ruchavikom abjomam 1,6 litra i mahutnaściu 84 ł.s. Maksimalnaja chutkaść — 178 km/h, raschod paliva — 7,5 ł na 100 km.
Bližejšyja kankurenty pa canie — indyjskija Maruti 800 i Maruti Omni, što kaštujuć 3860 dalaraŭ. Kali dalar padaražeje ź ciapierašnich 56 da 62 rasijskich rubloŭ, Lada Granta stanie piataj u rejtynhu samych tannych mašyn.
Samym tannym aŭto śvietu zastajecca z 2008 hoda indyjskaja Tata Nano za 976 dalaraŭ.
Aŭtamabili Lada ciapier pieravažna pradajucca ŭ krainach SND. Roźnica cen na rasijskich i zamiežnych rynkach, pavodle źviestak RBK, pryviała da rostu popytu ŭ krainach Mytnaha sajuza.
U listapadzie da 70% prodažaŭ mašyn rasijskich dyleraŭ prychodziłasia na Biełaruś i Kazachstan.
U Biełarusi ceny na «Łady» zaŭvažna adroźnivajucca ad rasijskich. Siedan Lada Granta 21901-020-41 2014 hoda vypusku na rasijskim sajcie Lada kaštuje 325 tysiačy rasijskich rubloŭ ci 5730 dalaraŭ. Taja ž madel u toj ža kamplektacyi ŭ biełaruskaha imparciora «Minsk-Łada» kaštuje 8400 dalaraŭ.
U Biełarusi Lada Granta na 46,5% daražejšaja, čym u Rasii.
Markietołah «Minsk-Łada» paćvierdziŭ «Našaj Nivie» zaŭvažnuju roźnicu ŭ cenach na Lada Granta. Ale adznačyŭ: «Za apošnija piać hod Lada ŭvachodzić u top samych pradavanych aŭtamabilaŭ u Biełarusi ŭ niezaležnaści ad taho, što ceny byli vyšejšyja za anałahi ŭ Rasii».
«Roźnica vyklikanaja dvajnoj vypłataj utylizacyjnaha zboru.
Na dadzieny momant u Rasii dziejničaje prahrama ŭtylizacyi aŭtamabilaŭ, jakuju padtrymlivaje AŭtaVAZ. U nas takoj prahramy niama, i ŭ bližejšy čas jana nie praduhledžvajecca dla ekspartnych rynkaŭ», — tłumačyć jon.
Pavodle źviestak z rasijskaha zavoda, takaja roźnica zachavajecca da kanca biahučaha hoda.
U nastupnym hodzie jana skarocicca: «Tym bolš, što našyja orhany ŭłady, mahčyma, daviaduć da kanca varyjant źniaćcia ŭtylizacyjnaha zboru z aŭtamabilaŭ, vyrablenych u Mytnym sajuzie».
Pa niekatorych madelach biełaruski imparciory damahlisia praktyčna roŭnych z Rasijaj cen.
Tak, Lada Priora ŭ peŭnych kamplektacyjach moža akazacca navat tańniejšaj, čym u rasijskich dyleraŭ. Mnohija madeli ŭ Biełarusi daražejšyja za rasijskija prykładna na tysiaču dalaraŭ.