Minskija ŭłady nie dali dazvoł na praviadzieńnie solnaha kancerta Źmitra Vajciuškieviča ŭ DK MAZ.
Upraŭleńnie ideałahičnaj raboty i kultury Minharvykankama nie dała dazvoł na praviadzieńnie kancerta Źmitra Vajciuškieviča, zajaŭlenaha na 12 studzienia ŭ DK MAZ.
Mierkavałasia, što ŭ hety dzień vykanaŭca razam z hurtom WZ-orkiestra zładzić urešcie vialikuju prezentacyju prahramy na vierš Hienadzia Buraŭkina «Varanok», što vyjšła ŭ 2013 hodzie. Rašeńnie ab vydačy hastrolnaha paśviedčańnia na heta mierapryjemstva ideolahi zaciahvalii. Zvyčajna arhanizatar atrymlivaje dazvoł ciaham piaci dzion, ale ŭ jaho mohuć paprasić pradastavić dadatkovyja materyjały, datyčnyja kancerta i praciahnuć razhladać dakumienty lišni tydzień.
«Jany try tydni čytali teksty maich piesień!», – kaža Źmicier Vajciuškievič. U vyniku arhanizataram admovili na padstavie taho, što ŭ ich adsutničaje damova z kancertnaj placoŭkaj. Pavodle praviłaŭ padačy, darečy, damovu takuju pry arhanizacyi kancertaŭ biełaruskich vykanaŭcaŭ pradstaŭlać uzhadniajučamu orhanu nie treba.
Adzin z arhanizataraŭ kancerta Vital Supranovič paviedamiŭ, što jany mieli damovu z DK MAZ, ale ŭ apošni momant jaje spatrebiłasia pierarabić – u suviazi ź źmienaj finansavych umovaŭ. Jakraz u hety čas i była atrymanaja admova ŭ praviadzieńni kancerta. Dyrekcyja DK MAZ sama dasłała list u Minharvykankam, dzie było napisana, što damova pamiž imi i arhanizatarami kancertu Vajciuškieviča na dadzieny momant nie zaklučanaja. Vidavočna, što pad prymusam…
«Jak adkrucili hajki, tak i zakrucili», – rasčaravana pramaŭlaje Źmicier Vajciuškievič. Da hetaha ŭ jaho sarvalisia jašče dva vystupy ŭ Biełarusi.
Pastaŭleny ŭžo ŭ płan kancert u viciebskaj fiłarmonii ź inicyjatyvy miascovych ideołahaŭ byŭ admienieny, a ŭ Breście nivodnaja placoŭka nie pahadziłasia pryniać apalnaha artysta.
Tak supała, što ŭ dzień zabarony svajho kancerta, Vajciuškievič padrychtavaŭ premjeru novaj pieśni. Jana zaviecca «Na Kalady» i napisanaja na vierš Uładzimira Niaklajeva.
«Ja musić samy ščaślivy kampazitar Biełarusi, bo vydatnyja paety mnie sami dasyłajuć svaje vieršy. Uładzimir Prakopavič prapanavaŭ mnie novy tvor i ja liču, što heta prosta padarunak losu. Atrymałasia prostaja historyja pra toje, što pavinna adbyvacca na Kalady i pra cud, jaki abaviazkova ździejśnicca ŭ hety dzień!», – pradstaŭlaje pieśniu vykanaŭca.
U lutym 2015 Źmicier Vajciuškievič płanujecca hościem prajekta «Žyvy Tuzin». Zrobim usio mahčymaje, kab jaho kancert adbyŭsia.
