Pieradkryzisnaje imknieńnie terminova patracić biełaruskija hrošy, pakul ich nie źjeła inflacyja, nakryła ahresiŭnym šopinham nie tolki tavary, jakija sapraŭdy spatrebiacca u kryzisny pieryjad. U sacsietkach ludzi pisali, što z «Mastackaha sałona» vynosiać žyvapis, hrafiku i skulpturu, niechta bačyŭ na praśpiekcie, jak siamja ledź niesła mnostva padušak.
Što rabić, kali vy nie strymalisia i nakupili ŭ pieradnavahodniaj kryzisnaj haračcy šmat rečaŭ, jakija vam nie patrebnyja? Dyzajn i sučasnaje mastactva zdolnyja dapamahčy i reabilitavać vas pierad vašymi dziećmi i krytyčna nastrojenaj pałovaj.
Scenar taki: stańcie pasiarod pakoja, raspraŭcie plečy, uzmachnicie čuprynaj, kali niama čupryny, z pohladam pieramožcy padnimicie pravaje bryvo, važna zakładzicie ruku za ruku i zajavicie, što ź siońniašniaha dnia vy dałučajeciesia da aktualnaha napramku sučasnaha mastactva stvareńnia instalacyj! Kali chto nie zaŭvažyŭ – tut možna vykarystać bolš žorstki pohlad – vy daŭno prahnuli pracavać z prastoraj jak kampazitar, i tolki deficyt času i strach mastaka być niezrazumiełym pieraškadžaŭ vam pryznacca ŭ hetym pierad blizkimi. Niekalki słovaŭ pra siurealistaŭ, kalektyŭnyja akcyi i Dziušana dadaduć realistyčnaści i padmacujuć vaš aŭtarytet.
Scenar biezdakorny. Kali ŭžo sam zasnavalnik instalacyi ŭ svoj čas fatahrafavaŭsia ŭ vobrazie dla fłakona tualetnaj vady, to možacie ŭjavić sabie pamiery vašaj indulhiencyi siońnia, u čas svabody i ŭsiodazvolenaści.
Isnuje tolki adzin vypadak, kali stanovišča vaša tak i zastaniecca nievypraŭlalna trahičnym. Ni dyzajniery, ni mastaki, ni navat anhlijskija navukoŭcy pakul nie znajšli adkaza na pytańnie, što rabić ź vialikaj kolkaściu nabytych televizaraŭ…