Paśla troch z pałovaj hadzin pieramovaŭ ŭdzielniki trochbakovaj kantaktnaj hrupy pa Ukrainie pakidajuć rezidencyju na vulicy Frunzie ŭ Minsku.
Vyniki sustrečy nieviadomyja.
* * *
Trochbakovaja kantaktnaja hrupa pa Ukrainie spadziavałasia zaćvierdzić na sustrečy 31 studzienia ŭ Minsku dakumient ab spynieńni ahniu i advodzie ciažkaha ŭzbrajeńnia ŭ Danbasie.
U subotu ŭ Minsk prybyli ŭdzielniki pieramoŭ trochbakovaj hrupy pa Ukrainie, u tym liku były prezident hetaj krainy Leanid Kučma. Prykładna ŭ 15.10 Leanid Kučma, a taksama pasoł Rasii va Ukrainie Michaił Zurabaŭ i śpiecpradstaŭnik staršyni ABSIE ŭ kantaktnaj hrupie Chajdzi Taljavini sieli ŭ aŭtamabili ŭ nacyjanalnym aeraporcie Minsk, nie razmaŭlajučy z žurnalistami.
Varta zaznačyć, što razam z Zurabavym u Minsk prybyŭ Viktar Miedviadčuk — lidar hramadskaj arhanizacyi «Ukrainski vybar», kiraŭnik administracyi prezidenta pry Leanidu Kučmu, kum Uładzimira Pucina. Pavodle źviestak rasijskich ŚMI, 27 studzienia Miedviadčuk sustrakaŭsia ŭ Daniecku z kiraŭnikami samaabvieščanych Danieckaj i Łuhanskaj narodnych respublik Alaksandram Zacharčankam i Iharam Płatnickim.
Za hadzinu da taho ŭ stalicu Biełarusi prybyli pradstaŭniki samaabvieščanych Danieckaj i Łuhanskaj narodnych respublik Dzianis Pušylin i Uładzisłaŭ Dziajnieha — taksama dla ŭdziełu ŭ sustrečy kantaktnaj hrupy pa Ukrainie.
Jak zajaviŭ u aeraporcie Pušylin žurnalistam, ź`iaviłasia infarmacyja pra padpisańnie ŭkrainskim prezidentam Piatrom Parašenkam ukazu ab pryznačeńni Leanida Kučmy paŭnamocnym pradstaŭnikom Ukrainy na pieramovach. «Chacia jon nie ź`iaŭlajecca pradstaŭnikom ułady, a ź`iaŭlajecca pryvatnaj asobaj, što zdymaje ź jaho jakuju-niebudź adkaznaść, kali damoŭlenaści buduć sarvanyja, tym nie mienš, my čakajem aficyjnaj publikacyi, — skazaŭ Pušylin. — Kali taki ŭkaz sapraŭdy ź`iavicca ŭ presie abo my ŭbačym na svaje vočy, heta pakidaje nadzieju na razvažnaść Kijeva».
Pres-słužba ABSIE siońnia nočču paviedamiła, što 28 studzienia prezident Ukrainy Piotr Parašenka sustreŭsia z udzielnikami kantaktnaj hrupy — pradstaŭnikom ABSIE Chajdzi Taljavini, byłym prezidentam Ukrainy Leanidam Kučmam i pasłom Rasii va Ukrainie Michaiłam Zurabavym, kab «abmianiacca dumkami pa samych nieadkładnych pytańniach, što tyčacca dieeskałacyi situacyi ŭ niekatorych rajonach Danieckaj i Łuhanskaj abłaściej».
«Napiaredadni kansultacyj u Minsku trochbakovaja hrupa zychodziła z razumieńnia, što nastupnyja praktyčnyja kroki pavinny być dasiahnutyja: abaviazalnaje pahadnieńnie adnosna nieadkładnaha spynieńnia ahniu i advodu ciažkaha ŭzbrajeńnia ad linii sutyknieńnia zhodna ź minskim miemarandumam ad 19 vieraśnia 2014 hoda; adsutnaść abmiežavańniaŭ dla pastaŭki asnoŭnych tavaraŭ i humanitarnaj dapamohi ŭ paciarpiełyja rajony Danieckaj i Łuhanskaj abłaściej, a taksama adčuvalny prahres u vyzvaleńni załožnikaŭ», — havorycca ŭ paviedamleńni.
Pavodle infarmacyi pres-słužby, raspracavany dakumient «moža być padpisany zaŭtra» (data nie ŭdakładniajecca, paviedamleńnie było razasłanaje ŭ noč z 30 na 31 studzienia. — BiełaPAN.). Jon utrymlivaje śpis kankretnych krokaŭ, raspracavanych dla ŭkaranieńnia vyšejpieraličanych pryjarytetnych zadač dla deeskałacyi situacyi.
«Kantaktnaja hrupa hatova adpravicca ŭ Minsk zaŭtra, kab pravieści čarhovy raŭnd kansultacyj i zaviaršyć uzhadnieńnie dakumientaŭ z padpisantami minskich damoŭlenaściaŭ ad 5 i 19 vieraśnia, nacelenych na ŭkaranieńnie mirnaha płana prezidenta Ukrainy», — havorycca ŭ paviedamleńni.
Nahadajem, ad imia samaabvieščanych Danieckaj i Łuhanskaj narodnych respublik minskija damoŭlenaści padpisvali Alaksandr Zacharčanka i Ihar Płatnicki adpaviedna.
