Skrynšot videahulni The Witcher 3: Wild Hunt
Videahulnia The Witcher 3: Wild Hunt pa suśviecie sieryi ramanaŭ Andžeja Sapkoŭskaha «Saha pra viedźmaka» atrymała łavinu krytyki. Usio pačałosia z recenzii Artura Hisa na Polygon, raspaviadaje Kanobu.
His pravioŭ 70 hadzin u «Dzikim palavańni» dy nie pabačyŭ na virtualnych astravach Navihrada, Skrelinha i Aksienfurta nivodnaha čarnaskuraha. Zatoje pabačyŭ paŭhołych žanočych piersanažaŭ dy šerah vorahaŭ žanočaha połu.
«Kali žančyn u The Witcher 3 nie zabivajuć, to da śmiešnaha seksualizujuć, — piša His. — Halizna ŭsiudy, ŭspaminajecca «Hulnia tronaŭ» na HBO. I navat kali jany apranutyja, hieraiń ŭsio roŭna čakaje niezajzdrosny los».
Jon zaŭvažaje, što ŭ videahulni možna praz adzieńnie pabačyć staniki i smočki. Pavodle jaho słoŭ, «klučavyja žanočyja piersanažy tut raspranajucca z nahody i biez».
U palemiku z Hisam ustupiŭ praz Twitter Denieł Vavra, dyrektar češskaj studyi Warhorse, što raspracoŭvaje svaju hulniu ŭ fentezijnaj siaredniaviečnaj Jeŭropie.
Varva patłumačyŭ, što suśviet «Viedźmaka» adlustroŭvaje siaredniaviečnuju kulturu, «fentezijnuju Polšču», a ŭ Polščy z 1300 pa 1500 hod zadakumientavana «tolki try čornych raby».
«Ci ličyš ty, što kožny raz, kali my chočam raspavieści historyju pra nas samich, nam treba dadavać u jaje inšyja kultury, kab nie być rasistami?» — pytaje Hisa Varva.
Pra siaredniaviečnaje staŭleńnie da žančyn Varva nie zhadvaŭ.
***
Cykł ramanaŭ polskaha piśmieńnika Andžeja Sapkoŭskaha «Saha pra viedźmaka» pačaŭ vychodzić z 1986 hoda, apošniaja na siońnia kniha vyjšła ŭ 2013 hodzie. Knihi raspaviadajuć pra viedźmaka Hieralta, palaŭničaha na monstraŭ, jaki sprabuje abaranić Cyry, junuju kniažnu razburanaha karaleŭstva. U adroźnieńnie ad tradycyjnaha fentezi, «Viadźmak» jość mienš epičnym, bolš postmadernisckim, žorstkim i naturalistyčnym tvoram.
Pa matyvach knih u 2002 hodzie vyjšaŭ papularny polski telesieryjał «Viadźmak» (taksama vydavaŭsia jak telefilm). Jon krytykavaŭsia pieravažna za ścisłaść siužetu ŭ paraŭnańni z knihaj i za małabiudžetnaść, ale nie za seksizm ci rasizm.
Pieršaja videahulnia sieryi «Viadźmak» polskaj studyi CD Projekt vyjšła ŭ 2007 hodzie, atrymała vysokija adznaki zachodnich krytykaŭ. Druhaja častka, «Zabojcy karalej» 2011 hoda, mieła jašče bolšuju papularnaść. Treciaja častka, «Dzikaje palavańnie», vyjdzie 19 maja 2015 hoda. Usie hulni majuć rejtynhi «18+» i anałahičnyja.
