Saviet Fiederacyi Rasii 25 śniežnia ŭchvaliŭ zakon, jaki vyzvalaje hramadzian Biełarusi ad zdačy ekzamienaŭ pa ruskaj movie, historyi i asnovach zakanadaŭstva Rasii pry atrymańni dazvołu na časovaje pražyvańnie abo vidu na žycharstva ŭ RF.
«Pryniaćcie fiederalnaha zakona budzie sadziejničać dalejšamu raźvićciu intehracyjnych pracesaŭ na terytoryi Sajuznaj dziaržavy i ŭmacavańniu dziaržaŭnaha sajuza Rasii i Biełarusi ŭ cełym», — cytuje TASS supravadžalnyja dakumienty da zakona.
Prezident Rasii Uładzimir Pucin, vystupajučy 15 śniežnia paśla pieramoŭ z Alaksandram Łukašenkam, zajaviŭ ab rašeńni nie raspaŭsiudžvać na hramadzian Biełarusi pałažeńni ab viedańni ruskaj movy, rasijskaj historyi, a taksama zakanadaŭstva RF pry atrymańni dazvołu na časovaje pražyvańnie ŭ RF.
«Z 1 studzienia hetaha hoda zamiežnyja hramadzianie, jakija žadajuć žyć i pracavać u Rasii, pavinny paćvierdzić vałodańnie ruskaj movaj, viedańnie rasijskaj historyi i asnoŭ zakanadaŭstva. Razam z tym, uličvajučy asablivy charaktar rasijska-biełaruskich suviaziej, my pryniali pryncypovaje rašeńnie nie raspaŭsiudžvać dziejańnie hetych norm na hramadzian Biełarusi», — skazaŭ Pucin.
Łukašenka padziakavaŭ Pucinu za pryniataje rašeńnie nie ekzamienavać biełarusaŭ. «Tamu što ruskaja mova — heta naša rodnaja mova… Dobra, što Vy heta ŭličyli i nie pastavili nas u niazručnaje stanovišča, kab my dakazvali viedańnie ruskaj movy», — zajaviŭ kiraŭnik biełaruskaj dziaržavy.
