Palicyja Hiermanii aryštavała bolš za 200 čałaviek pa spravie ab masavych biesparadkach na ŭskrainie Lejpcyha, zładžanych ultrapravymi aktyvistami.
U paniadziełak uviečary antyisłamski ruch PEGIDA arhanizavaŭ u horadzie antyimihrancki marš, na jaki vyjšli niekalki tysiač čałaviek.
Nahodaj da praviadzieńnia akcyi stali napady na žančyn u Kiolnie, učynienyja 31 śniežnia. Pavodle dadzienych uładaŭ, praktyčna ŭsie padazravanyja ŭ hvałcie — vychadcy z Paŭnočnaj Afryki i arabskich krain, jakija niadaŭna pierasialilisia ŭ Hiermaniju ŭ jakaści biežancaŭ i nielehalnych mihrantaŭ.
Udzielniki akcyi vykrykvali nacyjanalistyčnyja łozunhi, a taksama abrazy ŭ adras kanclera Anhieły Mierkiel za rašeńnie pryniać letaś bolš za miljon mihrantaŭ.
Adnačasova z antyimihranckim maršam hrupa ultrapravych učyniła pahrom na ŭskrainie Lejpcyha, dzie pieravažna žyvuć mihranty. Jany padpalvali aŭtamabili, bili škło ŭ damach i kidali ŭ vokny falšfiejery.
U niadzielu ŭ Kiolnie byli ŭčynienyja niekalki napadaŭ na zamiežnikaŭ — palicyja ŭpeŭnienaja, što ich ździejśnili ekstremisty ŭ adpłatu za hvałt napiaredadni Novaha hoda.