Varkucinski horna-ekanamičny kaledž spaliŭ knihi, vydadzienyja pry padtrymcy Fondu Sorasa. Pra heta havorycca ŭ adkazie ministerstva adukacyi Komi na zapyt vydańnia «7x7». Usiaho spalili 53 asobniki dvuch roznych knih.
Pa słovach zahadčycy biblijateki kaledža Aleny Vasiljevaj, adna z knih nazyvałasia «Śvietapohlad» i była «trošački relihijnaj». Vasiljeva ŭdakładniła, što kniha nie karystałasia papularnaściu ŭ studentaŭ.
U Varkucinskim politechničnym kaledžy kanfiskavana 14 asobnikaŭ šaści knih, vydadzienych pry padtrymcy Fondu Sorasa. Ich źniščać pry dapamozie šrederaŭ. Kala 400 asobnikaŭ knih kanfiskavali taksama va Uchcinskim dziaržaŭnym techničnym univiersitecie.
Jak zajavili ŭ ministerstvie adukacyi Komi, knihi kanfiskoŭvajucca pa ŭkazańni paŭnamocnaha pradstaŭnika prezidenta RF u Paŭnočna-Zachodniaj fiederalnaj akruzie Uładzimira Bułavina.
U śniežni 2015 hoda ŭ internecie raspaŭsiudziŭsia list namieśnika paŭnamocnaha pradstaŭnika prezidenta ŭ PZFA Andreja Traŭnikava na imia namieśnika staršyni ŭrada Komi Tamary Nikałajevaj. U im havaryłasia, što litaratura, vydadzienaja pry padtrymcy Fondu Sorasa, «farmuje ŭ maładziožnym asiarodździ skažonaje ŭsprymańnie ajčynnaj historyi i papularyzuje čužyja rasijskaj ideałohii ŭstanoŭki» i jaje nieabchodna kanfiskavać.
U kancy listapada 2015 hoda Hienprakuratura RF pryznała Fond Sorasa «niepažadanaj arhanizacyjaj». Heta aznačaje, što jamu zabaroniena vieści lubuju dziejnaść na terytoryi Rasii.
