Štohod Akademija kiniematahrafistaŭ ZŠA adznačaje najlepšych kinaakcioraŭ, scenarystaŭ, režysioraŭ dy apierataraŭ i ŭznaharodžvaje ich premijaj «Oskar». Jakraz siońnia nočču adbyłasia 88-ja cyrymonija ŭznaharodžańnia. A chto b atrymaŭ «Oskar», kali b premiju ŭručali ŭ nas — iraničnaja viersija «Našaj Nivy».
Najlepšy film hoda: inaŭhuracyja
«Inaŭhuracyja-5». Heta praciah kinasahi, vartaj Džordža Łukasa, za jakoj biełaruskija hledačy nazirajuć užo treci dziasiatak hadoŭ. Piataja inaŭhuracyja prajšła 6 listapada 2015.
Najlepšaja režysura: kapańnie bulby ŭ Drazdach
70 miachoŭ bulby ź pieršaha dubla. Film pra ŭboračnuju ŭ Drazdach.
Najlepšaja apieratarskaja praca: bieźbiletnica
Apieratar hoda, biezumoŭna, heta kiroŭca tralejbusa, praz akno jakoha ŭciakała dziaŭčyna-bieźbiletnica. Videa ablacieła ŭvieś śviet.
Najlepšaja žanočaja rola druhoha płana: Taćciana Karatkievič
Pryz dastajecca Taćcianie Karatkievič. Tolki sapraŭdnyja kinamany mohuć acanić jaje ihru.
Najlepšaja mužčynskaja rola druhoha płana: lejtenant milicyi
Dastajecca lejtenantu milicyi, jaki składaŭ letaś pratakoły na apazicyjnych palitykaŭ padčas mitynhaŭ. Razynkaj akciora źjaŭlajecca fraza, jakuju jon pramaŭlaje va ŭsich svaich kinastužkach: «A što tut adbyvajecca?»
Najlepšy aryhinalny scenar: Ułachovič i babry
Pryz dastajecca atamanu Ułachoviču. Padčas zdymak filma «Vybary-2015» scenaryst raspracavaŭ aryhinalny siužet, zhodna ź jakim žyviolny śviet u Biełarusi razrastajecca, a babry pieraškadžajuć rybałoŭstvu.
Najlepšy film na zamiežnaj movie: pravakatar na Płoščy
Dastajecca kinastužcy pad nazvaj «Jak z Płoščy ruski duch vyhaniali». Napačatku film nahadvaje «Bajcoŭski kłub», ale kinamanaŭ čakaje niepradkazalnaja kancoŭka.
Najlepšyja vizualnyja efiekty: bojka na sustrečy sa Starykavym
Vyhnańnie apazicyjanieraŭ z sustrečy ź ideołaham «ruskaha śvietu» Starykavym. Vidavočna bačnaja hukavaja apracoŭka, a kaskadziory, jakija syhrali achovu Starykava, vidać, atrymali niemały hanarar.
Najlepšy karotkamietražny ihravy film: piensijanier całuje kavun
Historyja piensijaniera, jaki całuje kavun ad Koli Łukašenki, vyklikała šyroki rezanans siarod kinakrytykaŭ. Samy kranalny momant filma na 00:12.
Najlepšy dakumientalny karotkamietražny film: «Načnyja vaŭki»
Dakumientalny film ad «Radyjo Svaboda». Hierojami siužeta stali viadomyja «Načnyja vaŭki».
Najlepšy saŭndtrek: Žanna Ramanoŭskaja
Dastajecca Žańnie Ramanoŭskaj ź pieśniaj «Malitva». U filmie «Vybary-2015», akramia svajoj asnoŭnaj roli, aktrysa vykanała pieśniu na słovy Janki Kupały.
Śpiecyjalny pryz kinaakademii: kresła dla Pucina
Dastajecca kresłu na minskich pieramovach. Tak stylova Pucinu jašče nichto nie paddavaŭsia.