Nina Bahinskaja na akcyi «Praśpiekt nacyjanalnaha ściaha» 14 maja ŭ Minsku, fota Radyjo Svaboda
69-hadovaja ŭdzielnica vuličnych akcyjaŭ Nina Bahinskaja paviedamiła Svabodzie, što z udziačnaściu prymie ŭ padarunak hrošy, sabranyja nieabyjakavymi ludźmi na pralnuju mašynu i mikrachvaloŭku.
«Ja razumieju, što moładzi chočacca salidarnaści. Ja heta vitaju i vielmi mocna ŭdziačnaja. Ale ja liču taksama, što treba mieć tryvałaść dabivacca praŭdy ad dziaržavy. Brać ad moładzi hrošy ci pralnuju mašynu mnie nia chočacca z maralnych pierakanańniaŭ. Heta ž moładź takaja, jak ja, — upartaja, nacyjanalna śviadomaja, ale praz heta nia maje asabliva mahčymaści zarablać. Mnie vielmi škada moładzi, ja vielmi joj spačuvaju. U mianie choć pensija jość, a ŭ ich — ničoha», — skazała aktyvistka.
Nina Bahinskaja skazała, što ličyć cisk na siabie sposabam uładaŭ spałochać inšych, chto choča ŭdzielničać u vuličnych akcyjach:
«Inšy čałaviek pahladzić, što voś u Bahinskaj zabrali majomaść, i nia pojdzie na akcyju, spałochajecca. Heta pry tym, što ŭ mianie kožny miesiac i tak z pensii vyličvajuć pa 500 tysiač za štrafy. Bolš nielha pa zakonie. Dyk ciapier jany za dziaciej uzialisia, za ich majomaść. Ale ja budu zmahacca za toje, kab našu majomaść viarnuli».
Zbor srodkaŭ u dapamohu Bahinskaj arhanizavała aktyvistka «Eŭrapiejskaj Biełarusi» Jula Ściapanava, paśla taho jak sud kanfiskavaŭ u pensijanerki techniku ŭ košt šmatlikich niaspłačanych štrafaŭ za ŭdzieł u vuličnych akcyjach. U internecie hrošy sabrali za 5 dzion.
27 traŭnia dzieci Niny Bahinskaj nakiravali ŭ sud skarhu, adznačyŭšy, što kanfiskavanaja majomaść naležyć im. Pra heta śviedčać i prykładzienyja dakumenty na kuplu-prodaž techniki.
