Ekśpierty Rasiakaści nazvali niebiaśpiečnymi mužčynskija kašuli Zara, MNG, Bellford i mnohich inšych zamiežnych brendaŭ.
U chodzie daśledavańnia jakaści papularnych u rasijan mužčynskich kašul ekśpierty pryjšli da vysnovy, što pałova ŭzoraŭ parušała pravy spažyŭca na dakładnuju markiroŭku. Jak havorycca ŭ paviedamleńni arhanizacyi, ekśpierty znajšli nieadpaviednaść zajaŭlenaha materyjału vyraba faktyčnamu.
«Całkam «bambukavaja» kašula V.B akazałasia na 100% ilnianoj, a ŭzor SELA na 100% składajecca z bavoŭny, pry zajaŭlenym źmiešanym składzie z 35% poliefiru», — havorycca ŭ paviedamleńni Rasiakaści.
U zajavie kampanii havorycca, što kašuli Zara, MNG, Bellford praktyčna nie prapuskajuć pavietra, «što niehatyŭna ŭpłyvaje na mikraklimat cieła pad tkaninaj, a značyć, i hihijenu spažyŭca».
Infarmacyja ab mierkavanych parušeńniach arhanizacyja pieradała ŭ Rasspažyŭnahlad.
Ekśpierty arhanizacyi zastalisia zadavolenyja jakaściu kašul tolki niekalkich brendaŭ, bolšaść ź jakich źjaŭlajucca rasijskimi, choć i vyrablajuć adziežu za miažoj.
«Pavyšanym patrabavańniam standartu Rasiakaści ŭ vyniku zmahli adpaviadać šeść tavaraŭ pad handlovymi markami O'STIN (Kitaj), Greg (Biełaruś), H&M (Banhładeš), Oodji (Kitaj), Incity (Kitaj), Chkalov (Małdova). Usia ŭkazanaja pradukcyja była zroblenaja za miažoj, a značyć, nie moža pretendavać na rasijski Znak jakaści», — havorycca ŭ zajavie Roskačiestva.
Aŭtanomnaja niekamiercyjnaja arhanizacyja «Rasijskaja sistema jakaści» była zasnavana rasijskim uradam u krasaviku minułaha hoda. Arhanizacyja, pavodle rasparadžeńnia ŭrada, pavinna pravodzić «niezaležnaje daśledavańnie jakaści tavaraŭ, pradstaŭlenych na palicach rasijskich kram». Taksama arhanizacyja prymaje rašeńnie ab vydačy najlepšym rasijskim tavaram rasijskaha Znaka jakaści.
