Nasielnictva Biełarusi zachoŭvaje asnoŭny abjom svaich źbieražeńniaŭ u siami najbujniejšych bankach krainy. Na 1 žniŭnia ŭ hetych bankach byli raźmieščanyja ŭkłady nasielnictva na 17,4 młrd denaminavanych rubloŭ.
Nahadajem, na 1 žniŭnia sukupny abjom usich bankaŭskich depazitaŭ nasielnictva (terminovych i pieravadnych) składaŭ 19,25 młrd denaminavanych rubloŭ, što ekvivalentna amal 10 młrd dołaraŭ.
Pavodle infarmacyi BiełaPAN, na pačatak žniŭnia abjom układaŭ nasielnictva ŭ «Biełarusbanku» składaŭ 8,5 młrd rubloŭ, «Biełahraprambanku» — 3,3 młrd, «BPS-Śbierbanku» — 1,6 młrd, «Bielinviestbanku» — 1,3 młrd, «Pryjorbanku» — amal 1 młrd, «Biełahazprambanku» i «Banku BiełVEB» — 0,87 młrd i 0,83 młrd rubloŭ adpaviedna. Takim čynam, u siami najbujniejšych bankach znachodzicca 90% usich (valutnych i rublovych) depazitaŭ nasielnictva.
Varta adznačyć, što z pačatku 2016 hoda abjom rublovych depazitaŭ nasielnictva, z ulikam naličanych pracentaŭ, praktyčna nie źmianiŭsia: na 1 žniŭnia pieravadnyja i terminovyja ŭkłady fizičnych asob u nacyjanalnaj valucie składali 4 młrd rubloŭ.
U toj ža čas abjom valutnych źbieražeńniaŭ fizičnych asob u bankach skaraciŭsia bolš jak na paŭmiljarda dołaraŭ: z 8,2 młrd dołaraŭ na 1 studzienia da 7,65 młrd dołaraŭ na 1 žniŭnia.
Śpiecyjalisty tłumačać skaračeńnie valutnych układaŭ fizičnych asob tym, što nasielnictva imkniecca za košt zroblenych raniej źbieražeńniaŭ padtrymlivać bolš vysoki ŭzrovień žyćcia va ŭmovach panižeńnia dachodaŭ (realnyja dachody nasielnictva ŭ pieršym paŭhodździ skaracilisia na 7%). «Pry istotnym źnižeńni dachodaŭ nasielnictva zachoŭvaje svaju zvyčku da spažyvańnia», — adznačaŭ letam na adnoj z kanfierencyj načalnik hałoŭnaha ŭpraŭleńnia manietarnaj palityki i ekanamičnaha analizu Nacbanka Dźmitryj Muryn.
