Były hienieralny dyrektar baskietbolnaha kłuba «Cmoki-Minsk» Kanstancin Šaraviera prysudžany da piaci z pałovaj hadoŭ pazbaŭleńnia voli ŭ papraŭčaj kałonii ŭzmocnienaha režymu z kanfiskacyjaj usioj majomaści i pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych funkcyj na praciahu piaci hadoŭ. Kłubu jon pavinien vypłacić bolš za 358 tys. denaminavanych rubloŭ. Taki prysud abviaściŭ 7 vieraśnia ŭ sudzie Maskoŭskaha rajona Minska sudździa Alaksandr Pietraš.
Data abviaščeńnia prysudu pieranosiłasia dvojčy. Pieršapačatkova abviaščeńnie płanavałasia na 31 žniŭnia, zatym jaho pieranieśli na 5 vieraśnia, paźniej — na 7 vieraśnia.
Kanstancin Šaraviera znachodzicca pad vartaj z 14 krasavika 2014 hoda. Byłomu spartyŭnym funkcyjanieru inkryminujuć kradziež šlacham złoŭžyvańnia słužbovymi paŭnamoctvami i złoŭžyvańnie słužbovymi paŭnamoctvami, jakoje paciahnuła ciažkija nastupstvy. Jon abvinavačvajecca ŭ ździajśnieńni złačynstvaŭ, praduhledžanych č. 4 art. 210, čč. 2 i 3 art. 424 i č. 2 art. 210 KK. Zhodna z č. 3 art. 424 KK sud Šaravieru apraŭdaŭ z-za adsutnaści składu złačynstva.
U pryvatnaści Šaravieru staviać u vinu kradziež hrašovych srodkaŭ kłuba, zališnie naličanych rabotnikam i spartsmienam, na asnovie roźnicy ŭ pamiery ŭznaharodžańniaŭ u pryvatna abumoŭlenych hiendyrektaram i aficyjna aformlenych kantraktach. Sumy mahli adroźnivacca šmatkroć. Škoda ad hetaj dziejnaści aceńvajecca bolš jak u 6,2 młrd rubloŭ.
Šaravieru taksama abvinavačvajuć u arhanizacyi vyvadu z abarotu kłuba srodkaŭ, što vydzialalisia na kampiensacyju charčavańnia spartsmienam padčas vučebna-trenirovačnych zboraŭ.
Pavodle materyjałaŭ kryminalnaj spravy, Šaraviera braŭ hrošy, jakija pryznačalisia supracoŭnikam. Aficyjnaja i realnaja zarpłata istotna adroźnivalisia. Jak tolki rabotnik atrymlivaŭ bankaŭskuju kartku, abvinavačany zabiraŭ jaje razam ź pin-kodam. U bankamacie jon zdymaŭ hrošy i pieradavaŭ padnačalenamu tolki častku naličanaj sumy, pra jakuju jany damaŭlalisia raniej ŭ vusnaj formie. Akramia taho, hulcy i treniery padpisvali kanfidencyjnuju damovu da dahavora, adnak sumu kantrakta Šaraviera dapisvaŭ paźniej, kali podpis supracoŭnika ŭžo stajaŭ u dakumiencie.
Častku zarobku pieradavali z ruk u ruki ŭ buchhałteryi. U hetym vypadku reštu, jak adznačana ŭ abvinavačańni, Šaraviera zabiraŭ i vykarystoŭvaŭ pavodle svajho mierkavańnia. Heta tyčyłasia zarpłaty jak biełaruskich hulcoŭ, tak i lehijanieraŭ «Cmokaŭ». Taksama śpisvalisia srodki, jakija pryznačalisia na kampiensacyju charčavańnia na zborach i treniroŭkach. U materyjałach spravy jość źviestki bolš jak pra 60 epizodaŭ złačynnych dziejańniaŭ.
24 žniŭnia dziaržabvinavaŭca Raman Biziuk paprasiŭ pryhavaryć Šaravieru da šaści hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści.
Šaraviera svajoj viny nie pryznaŭ. U sudzie jon zajaviŭ, što atrymanyja hrošy nie prysvojvaŭ, a vykarystaŭ na raźvićcio kłuba. Parušeńni buchhałtarskaha ŭliku rastłumačyŭ niedaskanałaściu biełaruskaha zakanadaŭstva, asabliva ŭ pytańniach supracoŭnictva ź lehijanierami.
«Toje, što abvinavačany vykarystaŭ hrošy na patreby kłuba, znajšło paćviardžeńnie padčas sudovaha śledstva, — zajaviŭ prakuror Biziuk. — Adnak nie ŭ tym abjomie, heta značyć značnuju častku jon usio ž taki prysvoiŭ. Da taho ž vyšejnazvanyja raschody nie byli naležnym čynam aformlenyja u buchhałteryi. Za zraschodavanyja hrošy Šaraviera nie daŭ spravazdaču. Heta značyć jak takim kradziažom heta nie źjaŭlajecca, ale škoda kłubu naniesienaja».
Kanstancin Šaraviera — viadomy saviecki baskietbalist. U 1970—80-ch hadach abaraniaŭ kolery minskaha kłuba RTI, jaki vystupaŭ u vyšejšaj lizie čempijanatu SSSR.
Sudovy praces nad Šaravieram pačaŭsia 14 śniežnia 2015 hoda. U lutym jaho zrabili zakrytym. Heta było vyklikanaje pačatkam daśledavańnia dakumientaŭ, jakija ŭjaŭlajuć kamiercyjnuju tajnu.
Niezadoŭha da zatrymańnia Šaraviera adznačyŭ 60-hodździe. Zhodna z materyjałami spravy, bankiet z nahody jubileju prachodziŭ na bazie kłuba pad vyhladam navučalnaha sieminara. Abvinavačańnie źviarnuła ŭvahu, što pakolki hości pili ałkahol, heta było zabaŭlalnaje, a nie adukacyjnaje mierapryjemstva.
