Akcyja pa zbory podpisaŭ za bieł-čyrvony-bieły ściah prachodzić u subotu ŭ centry Minska, niahledziačy na zatrymańnie arhanizataraŭ, paviedamlajuć apazicyjnyja aktyvisty ŭ sacsietkach. U liku tych, kamu ŭdałosia pryniać udzieł u akcyi, — paet i palityk Uładzimir Niaklajeŭ, mastak Aleś Maračkin, piśmieńnik Uładzimir Arłoŭ.
Siońnia hramadskaje ab`iadnańnie «Małady front» płanavała pravieści pikiet u centry Minska kala mahazina «Centralny». Aktyvisty mieli namier źbirać podpisy pad zvarotam u Ministerstva kultury za nadańnie bieł-čyrvona-biełamu ściahu statusu niemateryjalnaj historyka-kulturnaj kaštoŭnaści. Akcyja pavinna była pačacca ŭ 11 hadzin i, pavodle zadumy jaho arhanizataraŭ, praciahnucca da 20 hadzin.
Adnak za niekalki hadzin da akcyi ŭ rajonie Kamaroŭskaha rynku byŭ zatrymany adzin ź lidaraŭ Źmicier Daškievič. Jaho zaciahnuli ŭ mikraaŭtobus, za jakim jechała milicejskaja mašyna, paviedamiła jaho žonka Nasta Daškievič.
«Uvieś dvor abłožany ludźmi ŭ cyvilnym. Na vyjeździe z dvara stajać daišnyja mašyny, jakija spyniajuć ŭsie mašyny, što vyjazdžajuć ad mianie, pytajucca chto i što, pieradajuć pa racyi i prapuskajuć… Pryjechaŭ moj tata, skazaŭ, što vakoł kuča milicyi, sinich busaŭ biez numaroŭ. Tut niejki armahiedon ŭ ich», — paviedamiła Nasta Daškievič na svajoj staroncy ŭ fejsbuku.
Pavodle jaje słoŭ, pa telefonie ŭ Savieckim RAUS skazali, što Źmiciera Daškieviča ŭ ich niama.
Paźniej taksama stała viadoma pra zatrymańnie jašče adnaho aktyvista — Siarhieja Palčeŭskaha.
Dzie ciapier znachodziacca Daškievič i Palčeŭski, nieviadoma.
Varta adznačyć, što siońnia ŭ Minsku prachodzić zakryćcio motasiezona Harley Davidson H.O.G. Rally Minsk. U mierapryjemstvie ŭdzielničaje i Alaksandr Łukašenka, jaki ŭžo prajšoŭ na čale kałony matacyklistaŭ pa praśpiekcie Niezaležnaści da Pałaca sportu.