Pieravažnaja bolšaść baśnijskich sierbaŭ, jakija pryniali ŭdzieł u niadzielu ŭ refierendumie, prahałasavali za zachavańnie 9 studzienia ŭ jakaści nacyjanalnaha śviata — Dnia Respubliki Sierbskaj. Refierendum prajšoŭ nasupierak zabaronie kanstytucyjnaha suda Bośnii, jaki taksama pastanaviŭ pieranieści datu śviata.
Paśla padliku amal usich hałasoŭ dola tych, chto prahałasavaŭ za praciahvańnie śviatkavańnia Dnia Respubliki Sierbskaj 9 studzienia, pieravyšaje 99%. Jaŭka siarod nasielnictva sierbskaha ankłava Bośnii i Hiercahaviny skłała kala 60%.
Prezident Respubliki Sierbskaj Miłarad Dodzik zajaviŭ, što dzień refierendumu ŭvojdzie ŭ historyju jak «dzień sierbskaj rašučaści».
«Ja hanarusia narodam Respubliki Sierbskaj, tymi, chto vyjšaŭ i prahałasavaŭ», — zajaviŭ jon, vystupajučy ŭ horadzie Pale.
Raniej vysoki pradstaŭnik (mižnarodny administratar) pa Bośnii i Hiercahavinie Valancin Incka zajaviŭ, što hałasavańnie «nielehalna i niekanstytucyjna». Praviadzieńnie refierendumu zabaraniŭ baśnijski kanstytucyjny sud, paličyŭšy refierendum dyskryminacyjnym u dačynieńni da inšych nacyj, što pražyvajuć u krainie.
Na refierendum było vyniesiena pytańnie: «Ci padtrymlivajecie vy śviatkavańnie 9 studzienia Dnia Respubliki Sierbskaj?» 9 studzienia 1992 hoda adbyłosia pieršaje pasiadžeńnie parłamienta (skupščyny) sierbskaha naroda Bośnii i Hiercahaviny, što abviaściła respubliku baśnijskich serbaŭ samastojnaj dziaržavaj. Niezadoŭha da hetaha baśnijcy-musulmanie abviaścili pra vychad Bośnii i Hiercahaviny sa składu Juhasłavii.
Va ŭzbrojenym kanflikcie, što raspačaŭsia potym, zahinuli bolš za 100 tysiač čałaviek.
Člen prezidyuma Bośnii i Hiercahaviny ad baśnijskich musulman Bakir Izietbiehavič abvinavaciŭ prezidenta Respubliki Sierbskaj Miłarada Dodzika ŭ padrychtoŭcy plebiscytu pra abviaščeńnie niezaležnaści.
