Vice-prezident Parłamienckaj asamblei ABSE Kient Charsted pradstaviŭ u Vašynhtonie vytrymki z dakłada pa vynikach praviedzienych u Biełarusi parłamienckich vybaraŭ, dzie zroblena vysnova, što kanstruktyŭnych źmianieńniaŭ u vybarčym pracesie tak i nie adbyłosia. U toj ža čas palityk ukazaŭ na hatoŭnaść aficyjnaha Minska da supracoŭnictva ź mižnarodnymi strukturami.
Na dumku Kienta Charsteda, ciapierašniaje zakanadaŭstva Biełarusi nie harantuje demakratyčnaha praviadzieńnia vybaraŭ. Šerah rekamiendacyj, zroblenych BDIPČ/ABSIE, byŭ pakinuty biełaruskimi ŭładami biez uvahi. Charsted adznačyŭ, što z času minułych vybaraŭ situacyja pa niekatorych pakazčykach navat pahoršyłasia: «Farmiravańnie vybarčych kamisij było niepluralistyčnym. Ale kali na parłamienckich vybarach 2012 hoda siarod členaŭ učastkovych vybarčych kamisij była zafiksavanaja choć by minimalnaja kolkaść pradstaŭnikoŭ apazicyi, to sioleta ich prysutnaść stała amal niezaŭvažnaj — usiaho 50 na 65.500 supracoŭnikaŭ vybarkamaŭ».
Kiraŭnik Rabočaj hrupy PA ABSIE nazvaŭ absalutna nieprymalnaj arhanizacyju padliku hałasoŭ. Niahledziačy na žorstkuju krytyku ź jaho boku pa vynikach minułych prezidenckich vybaraŭ i piśmovyja instrukcyi, nakiravanyja Centrvybarkamam učastkovym kamisijam, 24% mižnarodnych naziralnikaŭ tak i nie zmahli ŭbačyć praces padliku biuleteniaŭ.
Taksama Kient Charsted zhadaŭ pra abmiežavańni, ź jakimi sutyknulisia kandydaty: sustrečy z vybarščykami možna było pravodzić tolki ŭ peŭnych častkach horada, niaroŭny dostup da ŚMI zvuziŭ mahčymaści dla apazicyjnych kandydataŭ, a mnohim palityčnym partyjam i zusim mnohija hady nie dazvalajuć zarehistravacca na terytoryi Biełarusi.
Asnoŭnaja rekamiendacyja, jakuju ABSIE nakiroŭvaje Minsku hod za hodam, tyčycca ŭdaskanaleńnia vybarčaha zakanadaŭstva. «Zychodziačy z majho dyjałohu ź biełaruskimi ŭładami, ja mahu skazać, što jany razumiejuć, čaho my ad ich chočam. Nam skazali, što času, jaki prajšoŭ pamiž minułymi i ciapierašnimi vybarami, było niedastatkova dla źmianieńnia zakanadaŭstva. Na moj pohlad, heta ŭpuščanaja mahčymaść. My b pastavilisia z razumieńniem da taho, što praces jašče nie zavieršany. Ale jon byŭ by choć by pačaty! I tym samym Biełaruś pasłała b vielmi dobry sihnał astatniamu śvietu. Zamiest hetaha biełaruski bok pakul abmiažoŭvajecca abiacańniami. Zrazumieła, my pa-raniejšamu čakajem», — skazaŭ kiraŭnik Rabočaj hrupy PA ABSIE.
Pry hetym Kient Charsted adznačyŭ hatoŭnaść Minska pracavać sa strukturami ABSIE, pra što, u pryvatnaści, zajaŭlaŭ ministr zamiežnych spraŭ Uładzimir Makiej. Pavodle słoŭ Charsteda, u Biełarusi razumiejuć, što kraina žyvie ŭ vielmi niebiaśpiečy čas, asabliva kali ŭličyć situacyju ŭ susiednich krainach, prablemu biežancaŭ i niespakoj za ŭłasnuju budučyniu. «U nas jość adčuvańnie, što biełaruskim uładam chaciełasia b bolšaj uciahnutaści ŭ hety praces. My taksama nie zacikaŭlenyja ŭ biaskoncych pieramovach i sustrečach, chaciełasia b bačyć kankretnyja vyniki. U najaŭnaści pazityŭny nastroj, i chaj hetym dakładam, jaki my pradstavim u Biełarusi 19 śniežnia, mahčyma, padniasiom kiraŭnictvu krainy horkuju pilulu, ja spadziajusia, što hetaja krytyka budzie ŭspryniataja ŭ kanstruktyŭnym klučy, i ŭ nas napieradzie zastajecca šmat mahčymaściaŭ dla sumiesnaj pracy», — adznačyŭ Charsted.
Biełaruski bok aficyjna pieradaŭ PA ABSIE zaprašeńnie ŭziać udzieł u nazirańni za parłamienckimi vybarami 2 lipienia, padčas 25-j štohadovaj siesii PA ABSIE ŭ Tbilisi.
